KHAWTHLIR

Thisen pe

Pachhunga University College NSS chuan Ni-ngani khan an college-ah blood donation camp an huaihawt a, mipa 160 leh hmeichhia 40-in Aizawl Civil Hospital tan thisen unit 200 an pe. PUC hian academic session kal mek chhungin thisen unit 534 an pe tawh a ni.

Easter Sunday

Naktuk Pathianni hi Isua khenbeh a nih hnua thlân aṭanga a thawh lehna ni, Easter Sunday a ni a, kohhran hrang hrangte'n uar takin an lawm dawn. Kohhran ṭhalai pawlte'n zing ni chhuah rualin Easter Sunrise Service an hmang dawn a; kohhran tam tak chuan chawhma inkhawm bànah Isua thawh lehna lawmna thingpui ruai an ṭheh dawn a ni.

Special connection

Power & Electricity department changtu chief minister Lal Thanhawla chuan, Aizawlah Special Connection Service hnuaia electric connection nei mi 21 an awm tih MNF member Lal-ruatkima zawhna chhangin House a hrilh.

In kâng

March 23, 2016 zan dar 9 vel khan Falkawna Lalzuimawia te luah lai in, Assam type chu a kâng a, bungraw chuh hman lohin a kàng ral. Falkawn aṭanga thu dawn danin, in kâng neitu hi Vanlalruati, Aizawla awm a ni a; a kan lai hian inah a luahtu Lalzuimawia te chhung-kua an awm lo a, an fanu damlo, State Referral Hospital-a an awmpui hlanin a kang a ni.

Ran enkawl zat

Veterinary Hospital, Aizawl chuan February 2016 chhung khan OPD-ah ran chi hrang hrang 1,627 an enkawl a; hri danna pek ran 206, mobile clinic-a enkawl ran 124, ran zai 1,704, bawngpui kah râi pali an nei. February thla chhung khan sorkar sum báwmah Rs. 20,300 an chhûng lut bawk.

Charge inhlan

KṬP General Conference-a hruaitu atana thlan, office bearer-te chuan March 23, 2016 aṭang khan hruaitu hluite aṭangin mawhphurhna an la ṭan. Mawhphurhna inhlanna hi Synod Office-ah neih a ni.