Kawngpui ṭha neih a nih theih nan CYMA-in YMA-te hma la turin a chah

Central YMA chuan thuchhuah siamin, Mizoram PWD-in Mizoram hmun hrang hranga kawngpui an siamah, ṭha tak leh tlo taka siam a nih theih nan anmahni huam chhung ṭheuhah theihtawp lo chhuah turin YMA branch, group leh sub-headquarters-te an chah.

CYMA chuan, Mizoram hmun hrang hrangah inkalpawhna kawng siam hna thawh mek a ni tih sawiin, "Hei hian kan ram hmasawnna turah kawngro thui takin a sú a. Inkalpawhna ṭha hian kan hun leh tha sênte titlemin, hlâwk zawka hun hmang theiin min siam a, hmasawnna nasa tak min thlen thei a ni," an ti.

Kawngpui ṭha siam a nih theih nan CYMA leh Mizoram PWD-in June 14, 2018-ah thawhhona thuthlung an siam tih sawiin CYMA chuan, "Thuthlung kan ziah ang ngeia belhchian dâwl leh ṭha taka kawngpuite siam a nih ngei theih nan kan huam chhungah theihtawp chhuaha kawng siam hnathawhte lo vil a, hma la turin kan inngen e," an ti a; YMA sub-headquarters, group leh branch-te chu theihtawp chhuah turin an chah a ni.

Kawng ṭha neih theihna tura hma an laknaah harsatna an tâwk a nih chuan Central YMA-ah thlen thuai turin an chah bawk.