Vote chhiar hun chungchangah NGO-te'n ECI hotute hmuh an tum

NGO Coordination Committee (Joint NGO) chuan Mizoram inthlanpui vote chhiar hun December 3, 2023 sawn a nih theih nan Election Commission of India (ECI) hotute Delhi-ah hmuha sawipui an tum a; hmaichhana sawipuiin awmzia a neih loh chuan Protest Day huaihawt an rêl.

Mizoram Legislative Assembly inthlanpuia vote chhiar hun sawn tura ngen chungchang hi Joint NGO chuan November 18, Inrinni khan Central YMA Committee Room-ah an ngaihtuah a; chairman leh CYMA president Lalhmachhuana'n kaihruaiin, CYMA, MUP, MHIP, MZP leh MSU aiawhte an tel.

Joint NGO ṭhukhawm chuan Mizoram inthlanpui vote chhiar hun sawn a nih theih nan New Delhi-ah ECI hotute kal chilha sawipui an rél a; hmaichhana sawipuiin awmzia a la neih loh zel chuan lungawi lohna lantirna, Protest Day huaihawt an rêl a ni.

ECI hotute hmu tura Delhi an kal hun tur an la sawi theih loh thu sawiin Joint NGO chair­man Lalhmachhuana chuan, "Appointment nei loa zuk kal ngawt chu a fuh lo thei a, he lam aṭangin appointment a theih ang anga buaipui phawt kan tum," a ti a; vawiin Thawhṭanni hian lehkhain appointment dilna thawn an tum thu a sawi.

Joint NGO chuan, "Vote chhiar hun sawn a nih theihna turin Mizoram Kohhran Hruaitute Committee pawh an hmazawnah theihtawp lo chhuah zel turin kan beisei," an ti.

Tarlan tawh angin, Mizoram chief electoral officer (CEO) Mahdup Vyas chuan tun hnai khan Delhi-ah ECI hotute a kâwm a, Mizoram inthlanpuia vote chhiar hun tura ruat December 3, 2023 (Pathianni) chu tihdanglam a nih dawn loh thu ECI hotute'n an lo hrilh.

ECI-in Mizoram MLA inthlanpui vote chhiar hun atana a ruat December 3, 2023 chu Pathianni a nih avangin Pathianni leh Inrinni ni lo, ni dangah sawn turin Mizoram Kohhran Hruaitute Committee (MKHC), Mizoram People Forum, NGO Coordination Committee leh political party hrang hrangte'n a hrang ṭheuhin ECI an ngen tawh.

ECI aṭangin chhànna a awm loh avangin MKHC chuan ngenna an thlen nawn a, chumi hnuah pawh chhanna a awm loh avangin tlawmngai pawl leh political party hrang hrangte sáwm khawmin November 2, 2023 khan hmalak zel dan tur an sawiho a ni. Chumi hnuah pawl hrang hrangte chuan a huhoin ECI-ah ngenna an thlen leh bawk.

ECI aṭanga chhanna a awm loh zel chuan, bawhzuia hmalak zel chungchang chu MKHC chuan tlawmngai pawlte kutah a dah a ni.