Mamitah Covid-19 vaccine leh IPPI chungchanga inbuatsaihna sawiho

Mamit District Task Force on Immunization chu an chairman Dr Lalrozama, bawrhsap hoin nimin khan DC Conference Hall-ah an ṭhu a; Covid-19 vênna damdawi (vaccine) chungchanga inbuatsaih dan tur leh January 2021-a  Intensified Pulse Polio Immunisation (IPPI) kalpui dan tur an rêl.

Mizorama WHO serveillance medical officer Dr Lalhlimpuii chuan, India rama Covid-19 vaccine dinhmun tlangpui a sawifiah a; Mamit district aṭanga Covid-19 vaccine a awm veleha dawng hmasa tur Covid-19 Portal-ah mi 780 thehluh a nih thu a sawi.

Dr Lalhlimpuii chuan, India sorkarin a din National Expert Group on Vaccine Administration for Covid-19 (NEGVAC) duh dan angin, Covid-19 vaccine chu frontline worker, healthcare lama thawk, kum 65 chung lamte leh natna benvawn nei sate pek hmasak tura ruahman a nih thu a sawi bawk.

Tarlan danin, Mamit district-ah Covid-19 chungchangah mi 4,650 swab sample endik a ni tawh a; chu'ng zinga mi 82 chuan Covid-19 an vei tih hmuh chhuah niin, chu chu test tawh aṭangin 1.76% a tling. Mamit district-a Covid-19 positive hmuh chhuah tawhte chu mipa 53 leh hmeichhia 29 an ni.

Ṭhutkhawmah hian January 2021-a IPPI neih tur chungchang sawiho a ni bawk a; Mamit district-a naupang kum 5 hnuai lam mi 10,444 hnenah zenghri danna pek tura ruahman a ni a, chuta tana vaccine vials mamawh zat chu 693 a nih thu an tarlang.

Mamit district-ah hian IPPI 2020-ah target aṭangin 98.3% pek an ni a, kum 2021-ah chuan target awm sa pe kim ngei tura hmalak an rêl a ni.