KHAWTHLIR

Thisen pe

November 18, Inrinni khan KṬP, Tlangnuam West Branch chuan ZMC tan an kohhran hall-ah thisen unit 37 an pe a, petute mipa 25 leh hmeichhia 12 an ni a; KṬP, Dam Veng Branch chuan an kohhran hall-ah Synod Hospital tan thisen unit 29 an pe a, petute mipa 25 leh hmeichhia pali an ni. ṬKP, Shalom Unit, Mission Vengthlang pawhin an kohhran hall-ah Civil Hospital, Aizawl tan unit 28 an pe a, petute mipa 22 leh hmeichhia paruk an ni.

Luiah tla hlum

Lalrosema (57), Sakawrdai chu November 16, 2023 tlai khan Tuiruang luiah a tla a, nimin zing dar 5:30 vel khan a ruang hmuh a ni. Lalrosema hi Tuiruang luia sangha a man tur chesualin, luiah a tla a; Sakawrdai bakah, Vaitin, Khawpuar, Ṭinghmun leh Zokhawthiang branch YMA member-te'n an zawng zui a, nimin khan a tlâkna aṭanga hla lutuk loah a ruang hmuh a ni. Lalrosema hi nimin chhun dar 12 khan an vui a ni.

Chawimawina dawng

Mizoram Civil Pensioner's Association (MCPA) chuan India rama civil pensioner-te zingah hna thawk ṭha ber chawimawina an dawng. Chawimawina hi MCPA aiawhin office secretary Romawia'n New Delhi-ah November 18, Inrinni khan a dawng a ni.

Cultural exchange

Experience in Inter State Living chuan North East Study Tour kaltlangin November 18, Inrinni khan Chanmari YMA Hall-ah Cultural Exchange an buatsaih. He hunah hian Hrangbana College Zùnléng Cultural Club, India Institute of Mass Communication, Aizawl Students Cutural Club leh Arunachal Pradesh Students Union of Mizoram ten hnam làm an entir a, mi hrang hrangin thu an sawi bawk.

Dengue vei zat

Health department chhinchhiah danin, kumin chhungin (November 12 thleng) Mizoramah dengue vei 1,735 hmuhchhuah an ni tawh a, dengue vang hian mi pakhatin nunna a chan. Kumin chhungin dengue vei nia rinhleh mi 11,317-te thisen endik niin, ch'ung zinga 1,735 chuan dengue an vei tih finfiah a ni.