BRTF hnathawkte thawmhnaw hlân

YMA, Darzo Branch chuan November 18, Inrinni khan Darzo leh South Vanlaiphai inkar kawng siamtu BRTF hnathawkte hnenah thawmhnaw chi hrang hrang an sem.

Darzo Branch YMA president Hming­thanzuala sawi danin, an khua leh S Vanlaiphai inkara kawng siama awmte hian Darzo aṭanga km. 2 vela hláah camp an nei a ni. An awmna hmun a vawh avangin mutbu leh thawmhnaw lum an nei ṭha tâwk lo niin an hria a, Darzo YMA chuan an tana thawmhnaw pe theite hnenah an neih ang ang theh khawm turin khaw mipui an ngen a; mipuiin an thawh khawm thawmhnawte chu an hlàn ta a ni.

YMA President chuan, harsa zawkte ṭanpui theia an awm chu an lawm thu sawiin, "A ṭhen chuan mutbu an lo nei mumal lo khawp mai a, a hmun ngeia zu hmuh khan kan lawmna a zual. Pathian mawlsawmna vang liau liau a ni," a ti.

Darzo hi in 300 chuang khua a ni a, YMA branch pahnih - Darzo Branch leh Darzo Vengthar Branch an awm a ni.