Thawk ṭha lo hêk hreh lo turin chah

Lunglei district bawrhsap Ramdinliani chuan November 18, Inrinni khan Marpara South Zonal YCA Hall-ah North Eastern Council (NEC) project hnuaia electrical wiring leh puanṭhui zirna khârna a hmanpui a; hmasawnna hna thawhah a ṭul chuan contractor hna thawk ṭha lote chu thuneitute hnena hêk hreh lo turin a chah.

Ramdinliani chuan, NEC-in Lunglei district-a Bunghmun RD Block chhung hmun hrang hrangah hmasawnna hna a thawk tih sawiin, "Chu'ng zingah chuan Marpara South khua tihhmasawn nan project siam a ni. Hmasawnna hna thawh hrang hrangte chu dik leh tling, chhenfâkawm tak a nih theih nan ṭan la u la, a ṭul chuan contractor hna thawk ṭha lote chu thuneitute hnenah hêk (complaint) hreh lo ang che u," a ti.

Training chhuakte chu a lawmpui thu sawiin Bawrhsap chuan, thlai thar chhuah leh hralh, thil siam chhuah leh hmasawnna ruhrel din chungchangahte sorkar tihsak hun ringawt nghak lo a, sorkar nawr kal thei khawpa hma la ṭhin turin a chah.

Electrical wiring zirnaah mi 20 leh puanṭhui zirnaah mi 15 an tel a, an zir chhungin daily allowance an dawn bakah, certificate leh eizawnna atana hman chhunzawm tur bungrua hrang hrang an dawng a ni.