MSDBR-in zirna-inah Ṭum 18 awareness programme an buatsaih

Social Welfare and Tribal Affairs leh Excise & Narcotics department (END) changtu minister Dr K Beichhua hoin nimin khan SAD Conference Hall-ah Mizoram Social Defence & Rehabilitation Board (MSDRB) an ṭhukhawm. Kuminah zirna-ina zirlai leh zirtirtute zingah MSDBR-in awareness programme ṭum 18 an buatsaih thu tarlan a ni.

Ṭhutkhawmah hian December 2019 - December 2020 chhunga MSDRB hmalakna sawiho a ni. An tarlan danin, kumin chhungin sikul leh college-a zirlai leh zirtirtute zingah awareness programme ṭum 18 buatsaih a ni a; YMA hruaitu te, de-addiction centre/rehabilitation centre enkawltute leh college lecturer-te tan training ṭum 28 buatsaih a ni bawk.

MSDRB hi kum 1999-a din niin, ruihhlo ngái an tlem theihna tura hma latu a ni a, Mizoram bakah, Tripura state an enkawl tel. Sorkar laipuia Ministry of Social Justice & Empowerment hnuaiah project pali - State Level Coordination Agency for Mizoram & Tripura NE-III te, Integrated Rehabilitation Centre for Addicts (IRCA) leh Outreach and Drop in Centre (ODIC) leh, Ministry of Health & Family Welfare hnuaiah Champhai leh Serchhip district-ah Link Worker Scheme an kalpui a ni.

MSDRB hmalaknain India rama a vawi khat nan middle school, high school leh higher secondary school zirlai kum 10-17 inkarte leh an rualpui sikul kai tawh lo (dropout)-te zingah drugs survey an nei a; school dropout mi 1,420 leh sikula zirlai 10,733-te zawhna zâwtin, zirchianna an kalpui tih an tarlang.

Drugs Free India campaign (Nasha Mukt Bharat campaign) neih mek a ni a, August 15, 2020-ah ṭanin, March 31, 2021 thleng Aizawl, Champhai leh Kolasib district-ahte an kalpui dawn. District pathumte hi sorkar laipuiin national survey a neihah ruih theih thil ti tamna - vulnerable district 272 a thlan zingah an tel a ni.