Tripura MLA-te tan inkaihhruaina thar siam

Tripura Legislative assembly rorelna mumal zawk nei leh tluang taka a kal theih nan, member pakua awmna committee chuan MLA-te tana inkaihhruana thar an siam.

Committee chuan Tripura assembly rules and procedures and conduct of business-ah amendment pahnih an siam. Amendment siam pakhat zawkah hian MLA-te chu kum thum aia rei tawha thil thleng chungchanga zawhna siam khap a ni. Inkaihhruaina dan siam thar pakhat zawkah hian session ṭan hmaa Speaker hnena zawhna theh luhah MLA-te'n zawhna pakhat hmanga department tam tak zawh kawp ang chi chu khap a ni bawk.

Assembly speaker, Biswa Bandhu Sen chuan inkaihhruaina siam ṭhat rawtna siamtu committee-ah chuan TIPRA Motha MLA pahnih bakah, CPIM MLA pahnih leh treasury bench aṭangin member an tel thu sawiin, an vaiin rawtna chu an pawm tih a tarlang. "Tripura Legislative Assembly hian Parliament tihdan zawmin, a hnung a zui zel a ni. Parliament-ah pawh hian member tu mahin kum thum aia rei tawha mi chungchangah zawhna a siam thei lo a ni. Hei vang hian he dan hi neiha hman ve kan duh a, assembly member-te hian zawm ve mah se ziakin dan hi kan nei lo a ni. Tun aṭang chuan Rules and Procedures and Conduct of Business hnuaia section 41-ah dah a ni tawh ang," tiin a sawi.

Speaker chuan zawhna pakhat hmanga department tam tak thil kaihkawp nghal chu rule 44 hnuaia awm a nih thu sawiin,"House rorelna a tibuai thei a ni. Zawhna pakhatin department pathum kaihhnawih zawhna pathum keng kawp ta se, minister pathumin chhanna an pek a ngaih avangin, supplementary question thlengin a chhanna a thui phah a. Hei vang hian house rorel a felfai zawk nan dan hi siam ṭhat a ṭul ta a ni," tiin a sawi bawk.