Easter Sunday hlim taka lawm a ni Governor-in mipuite duhsakna a hlân

Nimin khan Mizoram pumah Isua Krista kraws-a khenbeh a nih hnua a thawh lehna ni, Easter Sunday lawm a ni. Hetih lai hian, Governor Lt.Gen. Nirbhay Sharma chuan Good Friday leh Easter Sunday thuchah tichhuakin, Mizoram leh Mizo mipuite duhsakna leh lawmpuina a hlân.

Easter Sunday hi Mizorama kohhran hrang hrangte'n hlim takin an lawm. Kohhran tam takah chuan zing ni chhuah rualin Easter Sunrise Service an hmang a; Salvation Army corp hrang hrangte chuan varṭianah Isua a tho tih puangin rimawi an tum. Kohhran tam takin chawhma inkhawm bânah thingpui ruai an ṭheh a, tlaia ruaiṭheh an awm bawk.

Larsap chuan, Isua Krista hnungzuitute tana hun ropui, Good Friday leh Easter Sunday hlim taka hman a ni chu lawmawm a tih thu sawiin, "He ni thianghlimah hian Mizo mipuite thinlung takin lawmpuina chibai ka bûk a che u. Biak-in leh hmun hrang hranga he ni lâwmtute zawng zawng chu India ram bakah khawvel hmun tina remna leh muanna a awm zel theih nan inhlan thar leh ṭheuh se ka duh a ni," a ti.

India ram chu sakhaw tih bik nei lo, tu pawhin eng sakhua pawh a biak theihna ram a nih thu sawiin, Nirbhay Sharma chuan, "Kan sakhaw biakte chu lo inang vek lo mah se, kan inzahsak tawn zel avangin tun thlengin sakhua vanga buaina lian kan tawk lo a, a lawmawm hle," a ti a; India ram a ngêlngheh zual zelna turin sakhuana thilah mi dangte nêkchêp lo a, inngeih tlang taka awmho zel turin mipuite a chah.

Governor chuan, sakhua zawng zawngin mi dang chunga ṭhat chhuah, nungcha, thing leh mau chunga ngilneihna leh sual ngaih theih lohna an pawm vek tih sawiin, "Kristiannain a zirtirah phei chuan thil ṭha tih a langsar hle. Kristianna mite mithmuhah a mawi zual zel nan kawng engkimah Mizo mipuite chu India state danga mipuite tan entawn tlak ni zel tur leh hma sawn zel turin Good Friday leh Easter Sunday pual hian ka sawm che u a ni," a ti.

1. Easter Sunday hma zan, Inrinni zan khan Roman Catholic kohhrante chuan 'Easter Vigil' an hmang a, biak-in tithim vekin, biak-in tual aṭangin Isua thawh lehna, thim ata êng lo lanna lantir nan bati êng nen thawh lehna hun an hmang. (Kolasib-a Easter Vigil; Thlalatu - Stephen Auhmun).

2. Salvation Army Youth, Temple Corps band-ten tawtawráwt hâmin tawh lehna thu an puang.