BJP ṭawiâwm turin mipuite sáwm

BJP, Mizoram Pradesh hruaitute chuan, Inrinni khan Aizawl Press Club-ah thuthar thehdarhtute an kâwm a; BJP ṭawiawm turin Mizo mipuite an sáwm.

BJP Mizoram Pradesh president Dr JV Hluna chuan, Mizo mipui leh Mizoramin BJP sorkar leh prime minister Narendra Modi a do chuan Mizoram leh Mizo mipuite an ro telh telh dawn niin a sawi a, "Anni tan kan do a na lo. Mi state-in hma a sâwn duak duak dawn si. Chuvangin, a hlâwk thei ang bera chhawr ṭangkai turin kan rilru put hmang kan tihdanglam a ngai," a ti.

Dr JV Hluna chuan, BJP sorkar hmalakna hrang hrangte a tarlang a; India ram hmasawnna tur scheme tam tak, Mizoram sorkarin mipui an zirtir loh leh bank leh post office an ṭawiawm lohna a awm thu a sawi.

Kumin March 19-20 chhunga BJP National Executive meeting-ah a tel thu sawiin Dr JV Hluna chuan, "Meeting-ah hian PM Narendra Modi chuan tu nawrna vang maha tribal quota an tihbo dawn loh thu leh reservation-in a tum tak leh a phute'n an chan ngei theihna atan hmalak a nih zawk dawn thu a sawi a ni," a ti.

Dr JV Hluna chuan, Madhya Pra-desh-a TBZ missionary-in harsatna a tawh chungchangah MP state BJP president Nand Kumar Singh a hmu tih sawiin, "Thudik finfiah a nih hnuah TBZ missionary hi chhuah leh nghal a ni," a ti a; ram páwna missionary-te chhan tur leh an thlavâng hauh turin an theih chinah ke an pên zel dawn tih a sawi.

BJP Mizoram Pradesh hruaitute sawi danin, membership drive an neihnaah member 7,64,000 an inziak lut tawh a ni.