KHAWTHLIR

Thisen pe

Inrinni khan Bethlehem Vengthlang branch YMA chuan Aizawl Civil Hospital-ah thisen unit 93 an pe a, a petute mipa 71 leh hmeichhia 22 an ni. Jubili branch KṬP chuan Synod Hospital tan unit 28 an pe a, a petute mipa 23 leh hmeichhia panga an ni. Salvation Army Lunglei corps CO bial SAY pawhin Easter Sunday pualin Lunglei Civil Hospital-ah unit 33 an pe a, a petute mipa 28 leh hmeichhia panga an ni.

Km. 252.2 lai

Agriculture minister R Lalzirliana chuan Assembly session-a MNF member Lalruatkima zawhna chhangin, kum 2011-2016 chhungin NLUP Implementing Board hnuaiah link road km. 252.2 laih a nih tawh thu a tarlang.

Biak-in hawng

Samthang Presbyterian Kohhran biak-in sak thar chu, Inrinni khan Synod moderator Rev. H Lalrinmawia'n Pathian hnenah hlânin a hawng. Samthang kohhran biak-in pakuana hi kum 2008-a sak ṭan a ni a, a dung ft. 70 leh a vâng ft. 45 niin, mi 627 ṭhut theihna a ni a, a sak nan Rs. 74,36,866 an hmang. Samthang kohhranah hian member 737 an awm mek a a, biak-in thar lawm nan hian Inrinni tlaiah ruai an
ṭheh a ni.

Thubuai 2,575

Home minister R Lalzirliana chuan MNF member Dr K Beichhua zawhna ziaka chhangin, kuminah Mizoramah thubuai 2,575 ziah luh a ni tawh. R Lalzirliana tarlan danin, thubuai ziah luh zingah hian tualthah thubuai 27, rûkrûk thubuai 1,092 leh pawngsual thubuai 102 chhuichhuah a ni tawh. Thubuai hi kum 2013-14 ah 2,215 leh kum 2014-15 ah 2,512 ziah luh a ni.

Lehkhabu tlangzarh

Lok Sabha MP hlui Dr. R Roṭhuama (L) kut chhuak, 'Mizoram remna leh muanna inṭan dan leh a kal zel dan,' tih lehkhabu chu tun hnai khan Art & Culture minister R Romawia'n a tlangzarh.

CL Ruala'n hawng

Mizoram Blind Society pisa thar, Saron Veng, Aizawla mi chu Inrinni zing khan Lok Sabha MP CL Ruala'n a hawng a, MPSC kaltlanga zirtirtu lakah rualbanlote tan quota dahsak ṭhin tura MPSC Chairman a hrilh tawh thu a sawi.