PHED-in phai damdawi-inah damlo Enkawlna cheng nuai 70 chuang bá

Public Health Engineering (PHE) department chuan, state pawn lama damdawi-in hrang hrang 12-ah an department-a thawkte inentirna leh inenkawlna senso Rs. 70,34,874 an ba mek.

Mizoram sorkara department hrang hrangte'n phai damdawi-ina damlo inentirna man an bat zat, Vanglaini-in RTI Act hmanga a dil chu sorkar department-te'n an chhán mek zel. Tun hnaia PHE-in zawhna a chhan danin, phai lam damdawi-ina an bat zat chu Rs. 70,34,874 a ni a, Mizoram sorkar department zingah a ba tam ber dawttu an ni. A ba tam ber PWD chuan Rs. 1,89,16,040 an ba mek.

Sorkar department-te hnenah hian leiba an pek theih loh vanga damdawi-in lamin damlo an en theih tawh loh a awm leh awm loh zawhna chu, sorkar department zawng zawngin a awm loh thuin an chhang vek a ni.

PHE department-a thawkte hian department dang ang bawkin AMRI Hospital, Kolkata an pan nasa ber a, he damdawi-inah hian leibá Rs. 24,82,629 an nei mek a; an bat zawng zawng Rs. 70,34,874 aṭanga chhûtin 35.29% a tling. Damdawi-in dang 11-ah Rs. 45,52,245 an ba thung a ni.

PHED-in state pawn damdawi-ina a bat dan

# Damdawi-in Bat zat

1. AMRI Hospital, Kolkata Rs. 24,82,629

2. TATA Memorial Hospital, Mumbai Rs. 3,27,781

3. Apollo Hospital, Kolkata Rs. 1,80,817

4. RG Stone Urology & Laparoscopy, Kolkata Rs. 7,96,147

5. GNRC Hospital, Guwahati Rs. 7,18,873

6. BR Baroah Cancer Institute, Guwahati Rs. 6,24,419

7. Medica Superspeciality Hospital, Kolkata Rs. 6,23,608

8. India Spinal Injuries Centre, New Delhi Rs. 38,490

9. CMC, Vellore Rs. 9,00,072

10. SKSHEF, Netralaya, Guwahati Rs. 31,252

11. Guwahati SSM Rs. 1,19,257

12. CMRI, Kolkata Rs. 1,91,529

TOTAL Rs. 70,34,874