Ramsa chaw atan kum khatah nuai 48.74 seng

Aizawl Zoological Park, Sakawrtuichhun rama mi chu kum hnih kal ta chhung khan mi 13,944-in an tlawh. Sahuan tlawhtute aṭang hian kum khatah luh man Rs. 1,34,488 hmuh a nih laiin, ramsate chaw man atan kum khata sum sen zat chu cheng nuai 48.74 chuang a ni.

Aizawl sahuan hi Environ-ment & Forest department ta a ni a; kum 2001-ah Bethle-hem Vengthlang aṭangin Sakawr-tuichhunah sawn a ni. A zau zawng chu buh ṭîn 162 (hectare 65) hmun vela zau a ni a, Central Zoo Authority-in sahuan tênauah a pawm tawh a, November 26, 2006 khan hawn a ni.

Aizawl sahuan enkawltu sawi danin, January 17, 1970 khan Lushai district-a DC AC Ray chuan tuna Raj Bhavan quarters-ah hian sahuan bul a ṭan a, chumi hnuah Aizawl City Park-ah hian savawm, sazuk leh sava eng emaw zat a khawi chhunzawm leh a; hei hi Mizorama sahuan lama bul ṭan dan a ni.

Hun hmasa lamah chuan Aizawl Forest Division-in en-kawl-in, mi pakhat tan en man pawisa 12 a ni a; chumi hnuah Bethlehem Vengthlangah sawnin, buh ṭîn 25 hmun vela zauah sahuan siam a ni. Bethlehem Vengthlangah hun rei tak dah a nih hnuah, Sakawrtuichhun ramah an sawn leh ta a ni.

Aizawl Zoological Park-ah hian tun dinhmunah ramsa chi hrang 206 a awm a, chu'ng ramsate chu chi khat, a pawl khat ang zela ṭhenin, chi 36 an awm mek.

Sahuan enkawltute chuan, ramsa ṭhenkhat chu an chi a mang mai a hlauhawm vang te, ramsa chanchin zir mite'n ṭha taka an zir theihna atana ṭanpuitu atan te, an chenna ramngaw tihchereu zel a nih vanga humhalh duhna vang te, ramvak mite'n an kah hlum ṭhin vang te, mihring leh ramsate intihbuaina vang leh chhan hrang hrang vanga dah an nih thu an sawi.

Ramsa leh nungcha an khawite chu uluk taka an enkawl avangin rei tak tak an dam a, an inthlahchhawng ve ṭhin. Zan lama chaw zawng chite pawh eng emaw zat dah a ni. Chutih laiin, sahuan tlawhtu mi ṭhenkhatin kutthlak an chîn avangin ramsa leh nungcha ṭhenkhat chu an thih phah tawh tawh tih sawiin, pawi an tih thu leh neitu rilru pûa a tlawhtute'n an enkawl zel an beisei thu an sawi.

Sahuana ramsa leh nungcha an khawite zinga ṭhenkhat chu miin an pekte a ni a; ramsa zingah a mala awm, kawppui tur la nei lote an awm laiin, a huhoa awm chi zingah sanghal leh záwng chi hrang hrangte chu an neih ngah zual an ni. Ramsa ṭhenkhat chu an mamawh belh zel laiin, ṭhenkhat chu châwm a hautak em avangin an duh aia tam neihte pawh a awm.

Sahuan hi uluk taka enkawl a ni a, thawktute'n an phiat fai ṭhin. A enkawltute chuan, sahuan tlawhtute'n bawlhhlawh paih mai mai lo se an duh thu an sawi.

Aizawl Zoological Park-a ramsate chaw atan kum khatah cheng nuai 48 chuang an séng ṭhin. Chaw atan ni khata arsa gram 500 vel pek ngai te, ar puah sa kg. 2 pek ngai te, ni tin bawngsa pek ngai te, chaw chhum hmin sa pek ngai te, mai leh fu pek ngai chite pawh an awm.

Sahuan enkawltute chuan, khawvel hmun hranga sahuanah reng reng en man aṭanga inrêl-bâwl thei an awm ngai loh thu leh, Aizawl sahuan atan pawh budget-ah sum dah mai ṭhin a nih thu an sawi.