KHAWLTHLIR

Aizawl City Church unit ṬKP chuan nimin khan thisen pek rûnpui an huaihawt a, Civil Hospital, Aizawl blood bank tan thisen unit 12 an pe a, petute mipa 11 leh hmeichhia pakhat an ni. GM Higher Secondary School NSS unit pawhin nimin khan Champhai District Hospital blood bank tan thisen unit 3 an pe bawk.

Mizoram Consumers’ Union (MCU) buatsaih chanchinbu 'Consumer Chhantu' (monthly magazine) leh Prof. Chawngsailova ziah 'Ram Ropui-II' tihte chu nimin khan minister of state K Lalrinliana'n a pisaah a tlangzarh. Sorkar thuchhuah tarlan danin, Consumer Chhantu hi kum 1999-ah chhuah ṭan a ni a, July 27, 1999-ah RNI registration an hmu a ni.

Mission Organic Mizoram (MOM) website www.mission­organicmizoram.com leh MOM mobile application chu nimin khan Agriculture secretary Lalhmingthanga'n a pisaah a tlangzarh. MOM website leh mobile apps hi loneitute tan a ṭangkai lehzual theih nan Mizo ṭawng a tam thei anga hman a ni.

PC party chuan thuchhuah siamin, sorkarin Aizawl Municipal Corporation (AMC) inthlan a huaihawt rih lo chu hripui hluar zel tur vênna atan àwm an tih thu an tarlang. "Hripui punlun thei dinhmuna Mizoram a la din mek laia AMC election la neih rih loh hi hripui laka invênna leh himna la ni rih turah kan ngai," an ti.

State Referral Hospital-ah nimin khan Covid-19 vei mi pahnih dah luh an ni a, anni nen SRH-ah hripui vei mi 14 enkawl mek an ni. SRH-ZMC Bulletin tarlan danin, mi 14 zinga pakhat chu ICU-ah enkawl niin, oxygen pek a ni a; Isolation ward-ah mi 13 awmin, an zinga pali chu oxygen pek an ni bawk. SRH-a enkawl mi 14 zingah hian kum 60 chung lam mi pali leh kum 14 hnuai lam pakhat an tel.