Bru-te'n camp-a vote an thlak loh nan Theihtawp kan chhuah zel dawn: HM

Home minister R Lalzirliana chuan, Tripura refugee camp-a Bru-te'n an awmna hmuna vote an thlak lohna turin Mizoram sorkarin theihtawp a chhuah zel dawn tih a sawi a, Bru-te thil phût tam tak chu tihhlawhtlin chi a nih loh thu House a hrilh.

MNF member Lalruatkima zawhna chhangin Home Minister chuan, sorkar laipui, Mizoram sorkar leh Tripura sorkar inbiakna hnuhnung berin an rel angin, a hma thei ang bera Bru lak lêt hna ṭan leh tur a ni tih a sawi a, "Movement Plan pawh May 31, 2016 hmaa peih hman tura ruahman a ni," a ti a; tun hnaia Bru lak let tum an nihin Mizorama kîr an awm loh thu a sawi.

R Lalzirliana sawi danin, Road Map-4 ang chuan Bru lak letna atana sum mamawh tura ruahman chu cheng vbc. 68.50 a ni. Sum ruahman aṭang chuan Ministry of Home Affairs-in ṭum hnih, cheng vbc. 4.7 leh vbc. 5 Mizoram sorkar hnenah a pe tawh a; Rs. 46,57,369 hman a ni tawh.

Tripura refugee camp-a Bru, Mizorama kîr duh lote electoral roll-a paih an nih leh nih loh chu Election Commission of India thu a ni tih sawiin R Lalzirliana chuan, "ECI hian NGO-te'n inthlan boycott an tum ṭumin Bru-te'n MLA leh MP inthlanah an camp-ah vote an thlak tawh loh tur thu an sawi a, camp-a vote thlaktir leh an nih dawn chuan an thusawi ṭan chhan hian theihtawp kan chhuah ang," a ti.

HM Zira chuan, Reang Development Area siam tumna a awm lo tih sawiin, "Reang Development Area siam tum hi sorkar angin kan hre lo. Committee pakhatin hnam hnufual chawikanna atan an ti a, ṭha kan tih loh thu kan hrilh nghal," a ti a; Reang Development Area chu siam a nih ngai loh tur thu a sawi.

Home Minister tarlan danin, Tripura reugee camp-a Bru awm mek zat hriat a ni lo. Sorkarin Road Map-4 a siam ang chuan puitling 9,264 leh naupang 11,146, an vaiin mi 20,710 awm anga ngaih a ni. Mizoram electoral roll, January 15, 2015 ang chuan Bru voter 11,019 an awm. Vote nei hi Mamit district-ah mi 8,514, Lunglei district-ah 756 leh Kolasib district-ah mi 1,749 an awm a ni.

Bru-te thil phût

1. Bru rawn kîr lehte chhungkaw tin hnenah an intundinna tur ram pek.

2. Khaw khatah a tlem berah chhungkaw 500 tal awm a, electric, tui, sikul, anganwadi, damdawi-in, kawng ṭha, etc. pek.

3. Bru-te'n venhimna ṭha an neih theihna atan Central para military force dah. Hemi tur hian Bru mi leh sa lak ni se.

4. Bru chhungkaw tinte IAY pek.

5. Kashmiri Pandit leh Tamil refugee-te anga ṭanpuina sum dawn.

6. Kum 1995 electoral roll chauh ni loin, Tripura sorkarin anmahni chhinchhiahna tura a siam document pawimawhte pawh Bru kir turte endikna atan hian hman.

7. Thlai chi sem.

8. Ministry of Tribal Affairs hnuaiah Primitive Tribal Group nihna Bru-te pek.

9. MHA special secretary RCA Jain leh joint secretary Naveen Verma ten kum 2011-ah leh 2009-ah an lo tiam tawh angin Bru-te tan permanent development project siam.

10. Ṭanpuina sum Rs. 80,000 chu Rs. 1,50,000-a tihsan leh free ration kum hnih chhung sem.

Bru thil phûta HM chhànna

. An thil phût serial no. 1 leh 2 hi an phût anga ram pek tur a awm lo. Serial no. 8 pawh hi hnam bil induhsakna tur a ni a, dan ding lai leh khawtlang inrêlbàwl dan nen a inmil lo.

. Serial no. 3 hi ṭul kan ti lo. Kan police-te kan ring tawk a, Central para military force dah ṭulah kan ngai lo.

. Serial no. 5 leh 10 hi sorkar laipui chan a ni.

. Serial no. 4 leh 7 chu an lo kîr dan azira tihhlawhtlin tur a ni.

. Serial no. 6 hi chu a fuh loin kan hria.

. Serial no. 9 hi thil dik a ni lo a, one time developmment project siam chu âwm kan ti.