MPC-in T Sailo hriatrengna hun hmang

March 27, 2016 kha MPC dintu Brig. T Sailo thih champha vawi khatna a ni a, nimin kha a vui champha a ni. MPC party chuan nimin khan an pisaah Brig. T Sailo hriatrengna inkhawm an hmang.

Inkhawm hi senior vice president Vanlalhlana’n a kaihhruai a; MPC president Lalhmangaiha Sailo bakah, Brig. T Sailo chief minister a nih laia speaker leh minister lo ni tawh - Dr Kenneth Chawngliana, F Malsawma leh KL Lianchia ten thu sawiin, T Sailo chanchin, a hnathawh leh hmathlirte an sawi.

MPC president Lalhmangaiha chuan, T Sailo chu khawvela hruai-tu ropui leh chhuanawm tak takte zinga chhiar tel tlak a nih thu sawiin, "Mizoramin awpbehna leh harsatna namên lo India sipaite laka kan tawrh
lai khan, Mizo mipuite thlavang hauh turin, amah leh a thawhpuite nen India sipai rothap pui puite
aṭanga awpbehna kan tawrhte titawp turin huaisen takin an rawn pên a ni," a ti a; huaisen taka a beihna chu a hlawhtling tih a sawi.

Lalhmangaiha Sailo chuan, "Brig. T Sailo kha a hautak lo thei ang bera nun hmang mi, Mahatma Gandhi anga nun tláwm taka nung, ngaihtuahna sang tak nei mi, rinawmna, inpek zawhna leh tai-maknate nun chhuahpui mi a ni," a ti a; ram tana rawng a bâwl chhung zawngin Mizoramah rorelna dik a thlen theihna turin a bei tih a sawi.

Brig. T Sailo chu awm tawh lo mah se, a hmathlirte hmangin Mizote zingah a la chêng reng tih sawiin MPC President chuan, a hmathlirte theihnghilh lo a, Zoram tan kawng zawh turin mipuite a sáwm a ni.