MBBS zir zote sorkara kum 2 tal An thawh theih nan ṭan la dawn

Health minister Lal Than­zara chuan, Mizoram sorkar quota-a MBBS zirte chu an zir zawh hnuah kum hnih tal Mizoram sorkara thawh­tir tum a nih thu House a hrilh.

INC member T Sangkunga zawhna kal zelah Lal Thanzara chuan, "Mizoram quota-a MBBS zirte hi an pass veleh sorkarin mamawhna a nei a nih chuan sorkara kum hnih tal thawk tura tihna dan hi lekkawh a ni ṭhin emaw, ni ṭhin lo emaw, lekkawh ṭhat kan tum," a ti.

Health Minister chuan, National Health Mission (NHM) hnuaiah doctor lâk theih reng a ni tih sawiin, "Mahse, MBBS-te hian hmun kilkhâwra awm ai chuan private hospital-a thawh an duh zawk," a ti. MBBS zir zo hmelhriat an neih chuan tlawmngaia NHM hnuaia thawk tura hrilh turin House member-te a ngen a ni.

MNF member Dr K Beichhua zawhna chhangin Lal Thanzara chuan, The Mizoram Clinical Establishment (Registration and Regulation) Rules, 2014 hmangin Mizoram chhunga damdawi-inte chu registration tihsak mek an nih thu a sawi.

Zawh belhna chhangin Health Minister chuan, "Tun hnaiah mimal damdawi-in neitute nen kan inkâwm a, RSBY hmang­a an damdawi-in inenkawl a nih theihna atana tlawmngaih chhuah turin kan ngen mek a ni," a ti.

MNF member Lalrinawma leh INC member R Vanlalvena te zawhna inang chhangin, Lal Thanzara chuan, drugs testing laboratory dinna atan sorkar laipui aṭangin cheng vbc. 7.5 hmuh an inbeisei thu House a hrilh.