KHAWTHLIR

Thisen pe

Tuirial Airfield Bial KṬP chuan nimin khan Aizawl Civil Hospital tan thisen unit 23 an pe a, a petute mipa 22 leh hmeichhe pakhat an ni.

Nuai 1169.05 beisei

Revenue minister R Romawia chuan, MNF member Dr. K Bei-chhua zawhna ziaka chhangin, kum 2015-2016 ah Revenue dept.-in chhiah hrang hrang aṭangin cheng nuai 1169.05 a hmuh beisei a nih thu tarlangin, "Cheng nuai 629.89 hmuh a ni tawh," a ti.

NLUP sem

District Animal Husbandry & Veterinary Office, Lunglei chuan nimin khan NLUP hnuai-a bawng vulh thlangtu mi 16 hnenah bawngpui pahnih ṭheuh an pe.

IT Act thubuai

Kum 2011-2016 chhung-in Mizoramah Information Technology (IT) Act hnuaiah thubuai 57 ziah luh a ni tawh a, kum 2016 bikah thubuai ziah luh a la awm lo. Home department chhinchhiah danin, thubuai 57 zingah hian chargesheet 24 thehluh tawh a ni.

Fire Service Week

Home department-a additional secretary Lalbiak-zama hoin nimin khan a pisaah Fire Service Week, 2016 hman dan tur rel a ni. Week hman chhung hian vantlang hmun pawimawh laiah kângmei laka inven dan entirna buatsaih leh hmun pawimawhte kângmei laka a him leh him loh enfiah an rel.

Headmaster rel

Education minister H Rohluna chuan INC member RL Pianmawia zawhna ziaka chhangin, "Education dept. hnuaia high school leh middle school-a headmaster anmahni awmna tura sawn, awm duh lo an awm a nih chuan sorkar conduct rules leh dan dang a neihte hmangin an chungchang a ngaihtuah tur a ni ang," a ti.

Kudam 155

MNF member Lal-ruatkima zawhna ziaka chhangin Food Civil Supply & Consumers Affairs minister John Rotluangliana chuan,
tun dinhmunah Mizoramah kudam 155 a awm thu tarlang.