2015-ah anganwadi centre 2,244 ah Naupang 70,081 an inziak lut

Social Welfare minister PC Lalthanliana chuan MNF member Lalruatkima zawhna chhangin, kum 2015-ah anganwadi centre 2,244 a awm a, naupang 70,081 an inziah luh thu House a hrilh.

PC Lalthanliana chuan, nutrition dawnna atan kum tirah CDPO tinte survey neihtirin, an survey report-te chu Social Welfare directorate-ah compile a ni a, chumi hmang chuan allotment siam ṭhin a nih thu a sawi a, “Feeding instruction-te pein, chuta ṭang chuan project office-in centre wise allotment an lo siam ve
ṭhin a ni,” a ti.

Social Welfare Minister tarlan danin, nutrition hi naupang pang-ngai tan ni khatah Rs. 6, naupang mi pangngai pha lo tan Rs. 9 leh nu nau pawm leh nau pai tan Rs. 7 ruahman a ni.

Nutrition sem tur thi tawh anganwadi centre-a sem chhuah a nih lohna turin department-in theihtawpin hma an lak thu sawiin PC Lalthanliana chuan, “Eng emaw vanga thleng palh a lo awm hlauh pawhin lak let a, a ṭhaa thleng hram hram ṭhin a ni,” a ti a; anganwadi centre-in an kawl rei vanga lo thi palh a awm chuan sem loa paih tura hrilh ṭhin an nih thu a sawi bawk.