Mipuiin Congress party thlakna tur an zawng: MNF

MNF party chuan thuchhuah siamin, Congress party-in rin an hlawh lo mek niin an tarlang a, “Kum 2018-a Mizoram Assembly inthlan lo awm tur-ah Congress party thlakna tur mipuiin an zawng mek a ni,” an ti.

Mizorama sorkar mek Congress-in sorkar laipuiah innghahna tur an nei tawh loh bakah state tam zawkah mipui rin an hlawh tawh lo nia sawiin, MNF chuan, “An rorelna hi chhungkaw rorelna a nihzia te, an vote bank NLUP pawh dinchhuahna tak tak ni lo, vote duh avanga inzawrhna mai a nihziate mipuiin an hrethiam tawh,” an ti a; hmasawnna leh ei leh bara dinhmun siamṭhat an tum tak tak lohzia chu mipuiin an hre chiang tawh niin an sawi.

MNF chuan, Congress chu sorkar laipui leh state tam zawkah mipui rin an hlawh tawh lo a, kum 2014-a inthlanpuiah hneh taka paihthlak an nih thu te, kum 2015-a Delhi inthlanah Congress party-in seat an lak ve loh thu te, 2015-a Bihar inthlanah an lan phâk loh thute an tarlang a; “Kumin 2016 tir lam khan Mizoram chhiar telin India rama state 29-a state pariatah chiah ro an la rel a ni,” an ti.