PUC-ah Mathematics Summer Camp buatsaih ṭan a ni

Mizoram Mathematics Society (MMS) leh Mizoram Science, Technology & Innovation Council (MISTIC) ṭangkawp chuan nimin aṭang khan Pachhunga University College-a Mathematics department-ah Mathematics Summer Camp an buatsaih ṭan a, chawlhkar hnih a awh ang.

Mathematics Summer Camp hi Mizoram sorkara chief scientific officer Dr RK Lallianthanga’n a hawng a; RK Lallianthanga chuan, Mathematics-ah zirtirtute an pawimawh thu sawiin, “A bik takin high school leh middle school-ahte zirlai, Mathematics thiam lo leh harsatna neite’n tui ti tak leh nuam ti taka an zir theih nan zirtirtute’n ṭan kan lâk a ṭul hle,” a ti a; Mathematics nuam ti taka zir turin hmun (table) thiam leh formula hriat chian a pawimawh thu a sawi.

MMS secretary Dr LP Lalduhawma chuan, Mathematics Summer Camp chu pawl 10 leh 11 zir turte tana buatsaih a nih thu sawiin, “Zirlaite’n sikul chawlh laia Mathematics zirna kawnga hma an sâwn theih nan leh state dangte el pha khawpa thiamna an neih theih nan camp hi buatsaih a ni,” a ti.

Mathematics Summer Camp chhung hian Mathematics problem hrang hrang a tam thei ang ber zirlaite’n an chawk dawn a, a kar lakah zirtirtu leh research scholar-te’n an zirtir ṭhin dawn bakah, zirlai harsatna bik neite tan an duh duh zawh theihna help desk an siam dawn a ni. Camp hian April 9, 2016 thleng a awh ang.