Zo hnahthlak ṭhenkhatin YMA-a inchhûn luh an duh - CYMA President

Central YMA president Lalhmachhuana chuan, Mizo hnahthlak hnam peng hrang hrangte'n inpumkhatna an nunpui mek thu leh hnam péng ṭhenkhatte'n YMA-ah inchhûn luh an duh tih an thlen tawh thu a sawi.

Central YMA office bearer-te chuan Mizoram Journalists' Association (MJA) member-te nimin khan an pisaa léngah sáwmin, thil hrang hrang an sawipui a; CYMA OB-te an kal kim a, MJA aṭangin member 30 chuang an tel.

Inkawmnaah hian CYMA President chuan, Mizo hnam hrang hrangte inpumkhatna turin YMA-in hma an la mek zel tih sawiin, "Inpumkhatna hi tunah chuan a takin kan nunpui mek. Kan ṭhenawm ramah kan Zo hnathlakte'n harsatna an tawh avangin Mizoramah an rawn tlân lut a, YMA lo chu belh tur an nei chuang lo a, a theih ang angin kan lo buaipui a ni," a ti a, CYMA building-ah Zo hnahthlak ráltlânte tan riah lailawkna tur an siam thu a sawi.

Lalhmachhuana chuan, Zo hnahthlakte inpumkhatnain hma a sawn zel tih sawiin, "Hmar Inpuiin YMA-ah inchhûn luh an duh thu ziakin an rawn thlen tawh a, Darlawng pawl, Darlawng Hnam Inzawm hruaitute pawh rawn kalin, YMA-ah inchhûn luh an duh thu an rawn sawi," a ti.

Mizoramah ruihhlo a tam hle tih sawiin Lalhmachhuana chuan, "YMA-in ruihhlo a do hmasak lamah chuan heroin tlem tê tê chauh kan man a, tunah chuan a kg. deuh awlh awlha man tur a awm tawh," a ti a; Myanmar leh Manipur aṭanga ráltlâna rawn lutte chu ruihhlo donaah ṭan lâkpui tura an ngen thu a sawi.

CYMA President chuan, into­delhna lamah Mizo ṭhalaite'n ṭan an lâk nasat a ṭul thu sawiin, "Thawh hreh kan neih loh a ngai," a ti a; Mizoram zirna a ṭhat theih nan YMA-in theihtawp chhuaha hmalak an tum thu leh Mizoramah dan ngaih pawimawh a nih theih nan sorkar thar piang tur an beisei thu a sawi bawk.

MJA president C Lalram­buatsaiha chuan, CYMA hma­laknate ṭha a tih thu leh CYMA leh MJA chu ze inang lo tak ni mah se, an thawhho ṭhat a ṭul thu a sawi a; YMA kumpuan chung­changah, "Tunlai hi ram leh hnam humhalh a ṭul ber lai a ni hial mai thei. Thiam taka hmalak a ngai ang a, fimkhur taka hma in lak zel kan beisei," a ti.

CYMA general secretary Dr Malsawmliana sawi danin, YMA-ah hian member 4,90,601 awm mekin, mipa 2,86,858 leh hmeichhia 2,03,743 an ni a, life member mi 11,591 an awm. Sub-headquarters pariat, group 50 leh branch 820 a awm a; branch-te chu Aizawl khawpui chhunga mi 109, Mizoram chhung Aizawl pawn lama mi 657 leh Mizoram pawna mi 54 a ni.

Central YMA hian sorkar depart­ment pathum PWD, PHE, Fisheries leh, Samagra Shiksha-te thuthlung ziahpuiin an thawhpui mek a; thuthlung ziak loin Environment, Forest and Climate Change department leh MSACS an thawhpui mek bawk.