Vote chhiar ní chungchangah NGO-te'n ECI nawr zel an tum

NGO Coordination Committee chairman Lalhmachhuana chuan, Mizoram Legislative Assembly inthlanpuia vote chhiar ní, December 3, 2023 (Pathianni) chu sawn a nih theih nan a theih chen chen nawr zel an tum thu a sawi.

Lalhmachhuana chuan zawhna chhángin, "Tunah chuan Pathiannia vote chhiar tum hi sawn turin a theih chen chen nawr zel kan tum a, mob rule lam, buai nuai nuai záwng ni lo, peaceful (muan­awm) záwnga hmalak zel kan tum. Theih­tawp i chhuah zel ang u, tiin kan rêl tawh," a ti.

Election Commission of India hotute hmai­chhana hmu turin appoint­ment an dil tih sawiin Lalhmachhuana chuan, "Appointment kan hmuh theih chuan Pathiannia vote chhiar kan duh lohzia chiang taka zuk sawifiah kan duh," a ti a; appointment an hmu thei a nih chuan, political party hrang hrang hotu lúte pawh kal tel ve thei se an duh thu a sawi.

NGO Coordination Committee Chairman chuan, Mizoram Chief Electoral Officer-in ECI hotute zuk hmu tawh mah se, Mizorama kohhran leh páwl hrang hrangte duh dan a sawifiah tâwk thiam lo palh thei a, chuvang chuan zuk sawifiah ngei an duh thu a sawi a ni.