Thutiam zûla ding nghet leh si lote mipuiin an ngaithei lo - K Sapdanga

ZPM party chuan nimin khan an pisaah chhung inkhawm an hmang a, thu sawitu ZPM working president K Sapdanga chuan, thutiam zûla dinga nghet leh si lote mipuiin an ngaithei lo tih hriat a ṭul thu a sawi.

ZPM vice president Lalthansanga kaihhruai inkhawmah K Sapdanga chuan, inthlan hma zawng khan an policy leh manifesto-te mipui keu khumin an chhiar khum ṭhin tih sawiin, "Pathian leh mipui zara kan sorkar ve hlauh a nih chuan, chu kan policy bu tho chu mipuite'n min keu khum ang a, min chhiar khum ve thung tawh dawn," a ti.

ZPM Working President chuan, policy leh manifesto chu mipuiin rorelna dawhkana an hlàn kai chhan a ni thei tih sawiin, "Rorelna dawhkan aṭanga min nam thlak chhan pawh a ni thei," a ti a; thutiam zûla ding nghet leh si lote mipuiin an ngaithei lo tih an zirlaibu bung khat cháng khata chiang taka inziak chu chhiar hmaih tur a nih loh thu a sawi.

K Sapdanga chuan, mipui ṭanpuina dila an au kual laiin an candidate-te corruption-a inhnamhnawih lo tura an intiam nasat thu sawiin, "Pathian leh mipui zara hnehna kan chang mial a nih chuan candidate-te an intiam ang ngeia an din tlang theihna turin party mipui hi ṭanpui theitu hnai berte kan ni," a ti.

Sorkarna an chang a nih chuan Val Upa Council an pawimawh lehzual dawn tih sawiin Sapdanga chuan, "Anni hi hlemhletna laka kan fihlim theihna tura kan chakna thahrui, vengtu rinawm, thlamuantu hnai reng an ni dawn," a ti a, VUC uapna hnuaiah thianghlim takin mipui rawng an bàwl theih an beisei thu a sawi.

ZPM Working President chuan, an party chu an member aṭang ringawta sorkarna siam thei an ni lo tih sawiin, "Neutral-te an pawimawh. Thuneihna kan lo chang a nih pawhin chu thuneihna dawhkâna min dahtu chu a bul berah Pathian a nih rualin, Pathianin hmanruaa a hman chu mipui an ni. Chu mite duh dana kan kal lo a nih chuan min paih thla leh theitu chu anmahni tho an ni," a ti.