Kan dah hmasak ber tur chu Pathian a ni - R Lalthangliana

MNF adviser Dr R Lalthangliana chuan, MNF-in an dah hmasak ber tur chu Pathian a nih thu leh, Pathian hre chunga an kal chuan Pathianin sorkarna a pek leh tur thu a sawi.

Dr R Lalthangliana hian nimina Mizo Hnam Rûna MNF chhung inkhawmah thu sawiin, "MNF chu Pathian leh kan ram tan titu kan nih angin kan dah hmasak ber tur chu Pathian a ni. Pathian hre chunga hmangaihna, lainatna leh duhsakna nen kan kal a nih chuan Lalpa'n sorkarna min pe leh em em ang," a ti.

Pathian hruainaa harsatna lian tham awm loa inthlan zawh a ni chu lawmawm a tih thu sawiin R Lalthangliana chuan, "Politics-ah kum 30 báwr ka awm ve tawh a, tun ṭum MLA-te anga mahni bial vil ṭha leh ngaihsak an la awm loin ka hria. MLA chhuanawm tak tak MNF-in kan nei a, an bial an vil hneh em em vek hi a lawmawm tak zet a ni," a ti a; bial vil ṭha leh enkawl ṭha MLA an nih angin an bial ṭheuha mipuite'n an MLA-te duhsakna an hlan leh ngei a rin thu a sawi.

MNF Adviser chuan, MNF sorkarin hun khirh tak a tâwk tih sawiin, "Hun harsa leh khirh tak tâwk mah ila, Pathian leh mipuite ṭanhona zarah mualpho em em loin kan chhuak a, a lawmawm tak zet. Hun harsa kan tâwk chungin hmasawnna hna nasa takin department hrang hrangin kan thawk theite kha a lawmawm tak zet a ni," a ti.