KHAWTHLIR

KTP-in thisen pe

KṬP, Champhai Zotlang North Branch chuan an din champha vawi rukna pualin November 18, Inrinni khan Champhai District Hospital tan thisen unit 45 an pe a, petute mipa 41 leh hmeichhia pali an ni. Zotlang North Branch KṬP hian an din tirh aṭangin kum tin thisen pek rûnpui ṭum hnih an la huaihawt ziah a ni.

Ayurveda Day

Health & Family Welfare department hnuaia Directorate of AYUSH bultumin nimin khan Kolasib Rengtekawna TS Luaia Middle School-ah World Ayurveda Day vawi riatna hman a ni a, thupui chu 'Ayurveda for one health - Ayurveda for everyone on every day' tih a ni. Kolasib District Hospital medical officer (Ayush) Dr C Vanlalhlimpuia hoin doctor leh thawktu dangte'n mi 98 hriselna dinhmun an endik a, a thlâwnin damdawi an sem nghal a ni.

EFCI inkhawmpui

Evangelical Free Church of India (EFCI) Hmeichhe Pawl, Mizorama presbytery (bial) palite chuan November 17-19, 2023 chhung khan hmun pali - Sesawng, Vairengte IOC Veng, Chiahpui leh Sakawrdaiahte Annual Conference an hmang. Inkhawmpuiah hian kum 2023-2025 chhunga bial hruaitu tur an thlang a ni. EFCI, Lunglei Presbytery Hmeichhe Pawl chuan November 22-23, 2023 hian Tlabungah inkhawmpui an hmang ve bawk ang.

Kawng khâr dawn

PWD, Aizawl Road South Division chuan zanin dar 9 aṭanga naktuk zing dar 7 thleng Mission Veng Bazar leh aṭanga Kulikawn inkar kawngpui an thawm ṭha dawn a; hna thawh chhungin kawngpui khar a ni dawn tih Traffic SP-in thupek chhuahin a tarlang. Hna tibuai thei turin kawngpuiah lirthei leh bungrua dah phal a ni lo. Thupek hian chhiatrupna thil, kângmei leh rîkrum kaihhnawiha duty leh, dan leh thupek pawimawh bika police leh magistrate-te chêt velna a huam lo.

Hmanrua pe

Assam Rifles chuan Ṭhalai Hmasawn Pawl Orphanage Centre, Mission Vengthlang hnenah smart class an dinna tura hmanraw mamawh chi hrang hrang eng emaw zat an pe.