Ráltlân ṭanpuina dawn zat

Central YMA chuan Myanmar, Bangladesh leh Manipur aṭanga an ram/state buaina vanga Zo hnahthlak ráltlânte ṭanpuina atan cheng nuai 235.85 an dawng tawh.

CYMA general secretary Dr Mal­sawmliana sawi danin, CYMA hian Mizoram chhung bakah, state dang leh India ram páwn aṭangin raltlante ṭanpuina tur an dawng ṭhin a, nimin thleng khan cheng nuai 235.85 an dawng tawh a; an dawn tawh aṭangin cheng nuai 165.8 an hmang tawh a, hman loh cheng nuai 69 vel a la awm.

Ráltlante ṭanpuina tur an dawn hi CYMA chuan a hman dan tur an rêl ṭhin a; branch, group leh sub-headquarter YMA-te kaltlanga ṭanpuina an sem chhuah cháng pawh a awm a ni.