Kum 2022-23 chhungin Mizoramah HIV vei mi 2,384 hmuh chhuah a ni

Sorkar kum kal ta, 2022-23 chhung khan Mizoramah HIV vei (positive) mi 2,384 hmuh chhuah a ni a; kumin March thla thleng khan HIV/AIDS vei mi 28,344 hmuh chhuah tawh niin, chu'ng zinga mi 4,227 chu an thi tawh.

Mizoram State AIDS Control Society (MSACS) tarlan danin, kum 2022-23 chhung khan mi 77,392-te thisen endik aṭangin HIV positive mi 2,384 hmuh chhuah a ni a, positive hmuh chhuah rate chu 3.08% niin, chawh rualin ni tin HIV+ve mi 6 aia tam (6.53) hmuh chhuah an awm ziah ang a ni.

Mi náwlpui (general client) zingah 54,904-te thisen endik aṭangin HIV vei mi 2,233 an awm a; nu nau pai apiang endik niin, nau pai mi 22,488 endik zinga mi 151 chu HIV+ve an ni tih hmuh chhuah a ni.

March 2023 thleng khan Mizoramah HIV vei mi 28,344 hmuh chhuah tawh an ni a, chu'ng zinga mi 25,969 chu general client an ni a, mi 2,375 chu nu naupai an ni thung.

MSACS-in a chhinchhiah chinah HIV vei hmuh chhuah tam ber kum chu 2018-19 kha niin, mi 2,765 hmuh chhuah an ni a, chawh rualin ni tin HIV vei mi 7 chuang hret (7.58) hmuh chhuah an awm ang a ni.

HIV vei hmuh chhuah tawh mi 28,344 zinga a tam ber chu ṭhalai kum 25-34 inkar niin, mi 10,918 an ni a; a dawttu pawh ṭhalaite tho, kum 35-49 inkar niin, mi 7,125 an ni. Kum 14 hnuai lam HIV+ve mi 730 hmuh a ni tawh a, kum 15-24 inkar mi 5,685 leh kum 50 chung lam mi 1,511 hmuh chhuah a ni tawh bawk.

March 2023 thlengin HIV/AIDS vei hmuh chhuah tawh zinga mi 4,227 chu an thi tawh a, thi tawhte chu mipa 2,764, hmeichhia 1,392 leh naupang 71 an ni.

HIV veite damdawi lâkna, ART centre-ah mi 22,667 an inziak lut tawh a, mipa 13,423, hmeichhia 8,591 leh naupang 653 an ni a; ART damdawi la tawh mi 20,080 awmin, mipa 11,844, hmeichhia 7,643 leh naupang 593 an ni.