Kolasib MJA-te'n Bâwktlang Power Sub Station an tlawh

Tun hnaia Kolasib district chhung hmun hrang hranga kawlphetha hmuh ṭhat tâwk loh chungchangah nimin khan Kolasib district MJA-te chuan Bâwktlang Power Sub-Station an tlawh a, Power & Electricity executive engineer Vanlalhlima hoin thawktute'n an lo dawngsawng.

PE department hotute sawi danin, Mizoramin kawlphetha mamawh a lak luhte chu Power Grid kaltlang vek a nih vangin India ram hmun dangte nen a inzawm vek a, a ṭul angin power kal kualtir a ni. Tunah hian Badarpur aṭang bakah Kumarghat (Tripura) leh Jeribam aṭangtein kawlphetha lak luh a ni.

Mizoramah power sub-station pawimawh pali - Sakawrtuichhun, Luangmual, Zuangtui leh Bâwktlangte a awm a, Bâwktlang chu Badarpur nen line thlun zawm a ni. Bwktlang Sub Station-ah line leh control panel chhiate, transformer chhia leh dik lo dang a awm chuan inter state grid kaihhnawih a nih avangin thawktute'n an duh ang anga an lo tihdanglam theih a ni lo.

November 16, 2023 zan dar 11 vel aṭanga Kolasib district pumah kawlphetha a awm lo pawh a tìr aṭanga hma an la nghal chungin, inter state grid a nih avangin an inpeih hma thei lo a ni.

Bawktlang Sub Station-ah hian Serlui Hydel Project leh Tuirial Hydel Project aṭanga kawlphetha siam chhuahte a lut khawm a, tunah hian Sihhmui nen line thlun zawm turin hmalak mek ni mah se, zangnadawmna leh thil dang harsatna vangin a la puitling thei lo. Kumarghat leh Jeribam line erawh chu Sakawrtuichhun Sub Station nen thlun zawm a ni thung.

Zawhna chhangin PE department EE chuan, Kolasib district pumpuiin kawlphetha a mamawh zat chu chawhrualin megawatt 8 vel a nih thu a sawi a, "Kolasib khawpui bik chuan megawatt 4 a mamawh anga ngaih a ni. Ruahsûr hlekah electric current thim nghal ṭhin anga lang hi, ni sáin rei tak a hem ngar ngar hnuah ruah tlak vanga a huhin a chhe hma a ni mai thei. Ṭhenkhatah chuan hnim leh thil dangin line a lo tawk (touch) a, ruah tla avanga a lo huhin line a trip ve thei bawk," a ti.

Kolasib MJA-te chuan Bawktlang Sub Station panna kawng chu a chhe hle tih sawiin, "Rîkrum thilah transformer liante chhiain a thar phurh luh tur ni se, tunah chuan lirthei lian, rit phur chunga lut thei a ni lo," an ti a; thawktute indaih lo nasa chuan khawpui chhung lama duty chungchangah harsatna a thlen nasa niin thu an dawng tih an sawi bawk.