Kolasib District Registering Authority (DRA) chu an chairman John LT Sanga, bawrhsap kaihhruaiin nimin khan DC conference hall-ah an ṭhukhawm a; sorkar hriatpui loh leh dan anga taksa dinhmun endik leh damdawi chawh phalna nei lote lakah fimkhur turin mipui an chah.
District Registering Authority hi hriselna dinhmun enfiahna leh inentirna (clinical establishment)-te dan anga chhinchhiah leh khuahkhirh tura din a ni.
John LT Sanga chuan, hriselna dinhmun enfiahna laboratory chu natna chungchanga inenkawl zui zel dan tur hriltu a nih avangin a pawimawh thu sawiin, "Mihring himna leh hriselna khawih a nih angin clinic leh laboratory-te fimkhur taka kalpui a ṭul," a ti a; mihring himna dah pawimawh hmasa ber chunga danin a phût anga clinic leh laboratory-te kalpui zel turin Kolasib district-a clinic leh laboratory enkawltute a chah.
DRA convener Dr RK Lalthlamuana, Kolasib chief medical officer chuan Clinical Establishment Act, 2010 hnuaia clinical establishment-te zawm tur tlangpui a sawifiah. Kolasib CMO pisa chhinchhiah danin, Kolasib district-ah sorkar hriatpui clinical establishment 33 a awm mek a, chu'ng zinga pasarih chu sorkar enkawl niin, a dang 26 chu mimal laboratory/clinic a ni.
Ṭhutkhawmah hian Kolasib DRA hnuaia hmalak dan turte sawiho a ni a; clinic leh laboratory zinga provisional registration nei tawhte chu DRA hnuaia registration puitling nei thei tura danin a phût ang hlen theih nan kum hnih chhung hun pek an nih thu leh provisional registration la nei lote chu thla ruk chhung hun pek an nih dawn thu tarlan a ni.