Lungleiah Cooperative Week khar a ni
All India Cooperative Week vawi 17-na chu nimin khan Lunglei District Cooperative Union Ltd. Hall-ah khar a ni a, Mizofed chairman K Rothangpuia'n a hmanpui.
K Rothangpuia chuan, cooperative society hmanga hmasawnna chu India sorkarin a ngaih pawimawh thu sawiin, "PACS-te pawh loneitu leh kuthnathawk, mahni kutkea eizawn dan daptute tan a rawn chhawpchhuahsak a, hei hi hman ṭangkai kan tum tur a ni. Heti lamah hian ṭan lak a ngai," a ti.
Mizofed chuan Mizoram sorkarah ṭanpuina sum a dawng ngai tawh lo tih sawiin Mizofed Chairman chuan, "Kum tin Mizoram sorkarah cheng vbc. 25 a chhunglut ṭhin a, Mizofed hnuaiah share holder 400 vel an awm," a ti a, filling station hmun 10-ah an neih mek thu a sawi.
K Rothangpuia chuan Mizofed-in chhungkaw 208 tan eizawnna an siamsak mek tih sawiin, "Hâk zauh zel kan tum," a ti.
Ram leh hnam hmasawn nan cooperative movement hman ṭangkai thiam a ṭul thu sawiin, "AMUL Gold-te pawh bawng vulhtu tlemte intelkhawmten bul an ṭan aṭanga hetianga rawn zi chhuak ta an ni," a ti a, mi ramah pawh an tih theih chuan Mizoramah pawh tih ve theih a ni tih hriat a pawimawh thu a sawi.
Week khar inkhawmah hian CAO R Lalliantluanga chuan 'Aims & Objective of PMVDY & Cash A/C' tih a sawifiah.
Kumin All India Cooperative Week-ah hian thupui atan 'Role of Cooperative in making India a Rupees 5 Trilliom Economy and SDGs' tih hman a ni.