Mizoram leibá cheng vbc. 6977.13 RBI sum pûk pung nuai 57.21 cháwi

Mizoram sorkar chuan, kumin sorkar kum kal mekah Reserved Bank of India (RBI) aṭanga sum a pûkna aṭangin a pung cheng nuai 57.21 an chawi tawh. Hetih lai hian, Mizoram chuan kumin sorkar kum thlengin leiba cheng vbc. 6977.13 a nei mek.

Finance minister Lalsawta'n MNF mem-ber Lalrinawma zawhna a chhan danin, sorkarin a sum dinhmun a ṭhat loh avanga RBI aṭanga sum a pûkna dan hrang hrang hmangin kum 2015-2016 chhungin RBI aṭangin ṭum 11 pawisa a pûk tawh a ni.

Sum a pûk dan chu normal ways and means advances (WMA) hmangin ṭum nga, special drawing facility (special WMA) hmangin vawi nga leh overdraft hmangin vawi khat a pûk. Thil chi hrang hrang hmanga RBI aṭanga ṭum 11 sum a pûkna aṭang hian Mizoram sorkar chuan a pung cheng nuai 57.21 a chawi tawh.

MNF member Lalruatkima zawhna chhangin Finance Minister chuan, kum 2015-16 revised estimate ang chuan Mizoram sorkarin leibá cheng vbc. 6997.13 a neih mek thu House a hrilh.

Lalsawta tarlan danin, Mizoramin leibâ a neih dan chu - kum 2011-12 ah cheng vbc. 4548.45, kum 2012-13 ah vbc. 5114.20, kum 2013-14 ah vbc. 5608.47, 2014-15 (pre actual)-ah vbc. 6550.39 leh kum 2015-16 (revised estimate)-ah vbc. 6977.13 te a ni.

Kum 2015-16 a K-deposit-a pawisa dah zat hriat theih a la ni lo tih sawiin Finance Minister chuan a sawi a, "Kum 2015-16 hi financial year kal lai a nih avangin eng zat nge dah a nih dawn hriat a la ni lo," a ti.

Committee on K-Deposit-in K-deposit tihtlem emaw, pumpelh dan tur emaw rawtna a siamte ṭha taka zawm a nih thu sawiin Lalsawta chuan, "Department aṭanga K-deposit release an rawn dil hi uluk takin Finance department-ah lo en chiah leh a ni ṭhin," a ti a; RBI-a sum dinhmun azir leh an pawisa dilna hna thawh lai dinhmun (work progress) azirin pawisa pek chhuah a nih ṭhin thu a tarlang.

Finance Minister tarlan danin, sorkar kum tawp dawnah hnathawh hman chuan loh turte expenditure sanction pekin K-deposit a tihpun avangin hnathawh hman loh turte chu expenditure sanction pe lo a, kum thara revalidation tih leh tura hmalak a ni.

K-deposit dinhmun

Kum Sum zat

2011-12 Vbc. 755.16

2012-13 Vbc. 984.95

2013-14 Vbc. 1168.84

2014-15 Vbc. 1602.34