Additional Chief Secretary ruat

Mizoram sorkar chuan tun hnai khan IAS officer Arvind Ray (AGMUT:1984) chu Additional Chief Secretary-ah a dah a; GAD leh Vigilance department-te a enkawl ang.

Mizoram sorkara thawk mek IAS officer dang panga, Secretary hna chelh mekte pawh March 28, 2016 khan an department chan tihdanglam a ni.

Renu Sharma-i'n Home leh AD&AR; K Lalnghinglova'n AH&Vety, Excise & Narcotics leh Higher & Technical Education; V Lalremthanga'n Labour, Employment & Industrial Training, PHE leh Tourism; P Lalchhuanga'n School Education leh Social Welfare; Lalthangpuia Sailo-in Cooperation leh Parliamentary Affairs-te an chang dawn. R Thanga, MJS chuan District Council Affairs leh Law & Judicial secretary hna a chelh bawk ang.

Mizoram sorkar chuan IPS officer pension tawh, PC Lallawmsanga chu Disaster Management & Rehabilitation department-a consultant hna chelh turin a ruat. Consultant atana ruatna thupek hi March 28, 2016 khan DP&AR-in a chhuah a, thla ruk chhung thawk tura tih a ni a, Mizoram sorkara principal secretary tlukpui a ni ang.