Chanmari-Chaltlang & Bawngkawn-Leitan-a Phalna nei loa in sakte ṭhiah tum lo

Aizawl Municipal Corporation (AMC) commissioner Dr H Lal-thlangliana chuan, Chanmari-Chaltlang Dawrkawn leh Bawng-kawn-Durtlang Leitan inkárah phalna nei loa in sa an awm thu a sawi a; chutih rualin, an chungah AMC-in action lâk a tum loh thu a sawi.

Dr H Lalthlangliana'n ana pisaa thuthar thehdarhtute a kawmnaah, Chanmari-Chaltlang Dawrkawn leh Bawngkawn-Durtlang Leitan inkár kawngpui kama in sak phal lohna chin leh venhim chin tur AMC-in an teh fel tawh thu a sawi a, "Tukin khan in sak phal a nih loh thu (signboard) kan tár," a ti.

AMC Commissioner sawi danin, Chanmari-Chaltlang Dawr-kawn inkarah hian kawngpui aṭanga teha kawng chhak lam leh thlang lam ft. 50 huam chhungah in sak phal a ni lo a; Bawngkawn-Leitan inkarah chuan kawng aṭanga ft. 200 chin huam chhungah in sak phal a ni lo thung.

Zawhna chhangin H Lalthlang-liana chuan, UDPA department Secretary leh officer dangte nena Chanmari-Chaltlang leh Bawng-kawn-Leitan inkar khâma in sakte February 9, 2016-a an enfiah ṭuma thu dah angin, kawngpui kam khâm kara in sakte chu an enfiah mek zel tih a sawi a, "In sakte hi phalna nei loa sak vek a ni," a ti.

Dr H Lalthlangliana chuan, Chanmari-Chaltlang leh Bawng-kawn-Leitan inkar kawng-pui kamte chu khauh taka an venhim tawh dawn thu a sawi a; in sak tawhte chu phalna nei loa sak vek a nih thu a sawi rualin, "In sak tawh leh sak mekte chu kan khawih dawn lo a, building tihchhiat kan tum lo," tiin, in la sak leh tur erawh chu khauh taka ven an tum thu a sawi.

Hetih lai hian, February 9, 2016 zinga Chanmari-Chaltlang leh Bawngkawn-leitan inkar kawngpui kama in sakte enfiah ṭum hian UDPA hotute chuan, in sak tawh tihngaihna a awm lo tih zel dawn chuan a buaithlak tur thu leh dan loa in sate chu ṭhiahsak theih an nih thu te, ṭhiahsak a nih pawhin, a ṭhiah man chu in neitu tum tur a nih thute an sawi.

Kawngpui kama khâm kara in sak phalna pek tawhte chu architechtural design anga sak a nih leh nih loh AMC-in an endik ang a, design ang loa in sak a awm chuan, architechtural design siamtu licence cancel sak thlenga hmalak leh dan loa sa leh in him lo zualte chu ṭhiahsak thlenga hmalak an rêl a ni.