KHAWTHLIR

Sava veh khap

Aizawl DC chuan Cr.PC Section 144 hmanga thupek chhuahin, "Tumahin silai/air gun hmangin ramsa leh sava an kâpin an veh tur a ni lo. Thupek zâwm loa ti luitu chu IPC Section 188 hmangin hrem an ni ang," a ti. Thupek hian thla hnih chhung a huam ang.

Thisen pe

Ṭhuampui bial KṬP chuan Central KṬP blood donation calendar angin nimin khan Aizawl Civil Hospital tan thisen unit 32 an pe a, a petute mipa 27 leh hmeichhia panga an ni.

Doctor 136 la

Health minister Lal Thanzara chuan MNF member Lalruatkima zawhna ziaka chhangin, kum 2011-2016 chhung-in doctor 136 lak thar a nih thu a tarlang. Doctor an lak tawh dan chu - kum 2013-ah medical officer 88, kum 2014-ah doctor specialist 10 leh AYUSH doctor 10, kum 2015-ah medical officer 27 leh dental surgeon pakhatte a ni.

Tanpuina hlan

State Bank of India, Champhai branch chuan Thawhṭanni khan Champhai District Hospital-a dah turin wheelchair leh stretcher panga ve ve an hlân.

Loneitute zirtir

Advanced Research Centre for Bamboo and Rattan (ARCBR) chuan, nimin khan an conference hall-ah loneitute tan training an buatsaih. Training-ah hian loneitute chu mau leh hruipui chîn dan bakah, meihawl siam dan an zirtir a ni.

Vbc. 64.94 pe

Land Revenue & Settlement (LRS) minister R Romawia chuan MNF member Lalrinawma zawhna ziaka chhangin, Bairabi - Sairang inkar rel kawng siamna atan mimal ram hectares 404.41 lak a nih thu a tarlang a, "Compensation-ah cheng vbc. 64.94 pek a ni tawh," a ti.

MJA GS

MJA Executive Committee member atana thlan tlinte zinga mi, C Lalhmachhuana chu MJA General Secretary atan MJA president Vanlalrema Vantawl chuan a ruat thar.