Property tax Rs. 1,13,55,537 hmu tawh

Aizawl Municipal Corpo-ration (AMC) chuan, kum 2015-16 chhunga March 28, 2016 thlengin property tax aṭangin Rs. 1,13,55,537 an hmu tawh a; sorkar kum thar aṭangin property tax chu local council tinah engtik lai pawha pek theih turin ruahmanna an siam.

AMC commissioner Dr H Lal-thlangliana chuan nimin khan a pisaah thuthar thehdarhtute kâwmin, property tax chung-changah AMC dinhmun leh ruahmanna tharte a hrilhfiah. Kum 2015-16 chhunga property tax aṭanga hmuh an inbeisei chu Rs. 3,00,00,000 a nih laiin, kumin March 28 thleng khan Rs. 1,13,55,537 (37.85%) an hmu tawh tih a sawi a ni.

Kum 2015-16 atan property tax chu a la pek theih reng tih sawiin, H Lalthlangliana chuan, March 31-a sorkar kum a ral hnuah erawh chu tax pek tur zat aṭanga 10%-a tihhniam (rebate) erawh chu a awm thei tawh dawn lo tih a sawi.

Dr H Lalthlangliana chuan, property tax chu a vawi khatna ni mah se, mipuiin an pe ṭha thawkhata an hriat thu leh lawmawm an tih thu a sawi a, "Local council leh mipuiin property tax khawnah AMC staff-te an ṭawiawm ṭha hle a, property tax pek an hreh lem lo tih a lang a, Mizo mipuite'n chhiah pek kan hreh lo niin a lang," a ti.

Kum 2015-16 chhunga property tax lak tawhah hian Bungkawn Vengthar LC huam chhung aṭangin a lut ṭha ber a, 88% a lut. Dawrpui LC chhung aṭangin sum a lut tam ber a, Rs. 6,27,583 a lut a ni.

AMC Commissioner sawi danin, kum 2016-17 chhung atana property tax khawnna atan April 2016 chhungin in tinah survey & assessment tih tum a ni a, April 4-ah ward tinah ṭan tum. Survey & assessment tihna tur hian in neitute chu pass (LSC, etc.) xerox photo copy lo nei ṭheuh tur leh, in len zawng, sàn zawng leh sak kumte lo hre turin an chah a ni.

AMC ruahman dan chuan, kum 2016-17 ah chuan property tax hi veng chhungah pek hun bik awm loin, kum tluana pek hun hawn a, mahni local council ṭheuhah mahni remchan huna pek theih tura tih tum a ni. The Mizoram Municipalities (Property Tax) Management Rules, 2014, Rule 2 (55)-in a sawi angin, in din lohna ram ruak (vacant land)-ah pawh property tax hi lak tawh tur a ni bawk.