MSHCS-in health care bill bá cheng nuai 5,278.51 a nei mek

Mizoram State Health Care Scheme (MSHCS) hnuaiah April 2022 - March 2023 thlenga damlo inenkawlna senso (bill) lut ṭhenkhatte sorkarin a pe tawh. November 20, 2023 thleng khan healthcare bill bá (bill la pek loh) cheng nuai 5,278.51 a awm a; MSHCS-in damlo bill tur pawisa kawl lai an nei tawh rih lo.

Vanglaini-in RTI Act tlawhchhana a zawhna Mizoram State Health Care Society SPIO-in a chhàn danin, November 20, Thawhṭanni thleng khan MSHCS chuan April 2022 - March 2023 chhunga damdawi-ina damlo inenkawlna bill an dawn tawh 15,221 zinga 4,849 (31.85%)-te bill an pe tawh. Bill an pek tawh 4,849 hi June 2022 thlenga bill lutte a ni a, a hnu lama bill lutte pek a la ni lo.

Sorkar kum kal mek 2023-24 ah MSHCS chuan Mizoram sorkar aṭangin healthcare bill atan pawisa ṭum li an dawng tawh a, an pawisa dawn hnuhnung ber chu October 8, 2023-a an dawn Rs 4,00,00,000 a ni.

MSHCS SPIO chuan, damlo bill tur pawisa kawl mek an neih leh neih loh zawhna chhangin, "Healthcare bill pekna atana sum kan dawn hi kan dawn veleh bill pek chhuah nan hman ral nghal zel a ni a, tun dinhmunah hian healthcare bill pekna tur pawisa kan nei lo," a ti.

MSHCS policy hi kum 2022 aṭangin sorkar kum chhiar dan (April-March) anga kalpui a ni a, a hma lam zawngah chuan October aṭanga a kum leh September thleng atan kalpui a ni ṭhin. Sorkar kum kal mekah MSHCS-a inziak lut chhungkaw 26,569 an awm a, chu'ng mite chuan kuminah bill 5,550 an thehlut tawh a ni.