Hachhek tlangdungin kuhva rah thawn chhuahah harsatna tâwk

Hachhek tlangdunga kuhva chíngtute chuan tunlai hian an kuhva rah thar chhuahte state páwna thawn chhuah kawngah harsatna an tâwk mek.

Hachhek Bial Kuhva Chingtu Pawl (HBKCP) hruaitute hnen aṭanga Vanglaini thu dawn danin, kuhva tharte chu hralh vek tawh mah se, a man an la hmu kim lo. Hnam dang hnenah kuhva rahte lawh a nih hma aṭangin agreement fel tak neia hralh ṭhin a ni.

Kuhva rah man chu a tirah eng emaw zat an inpe lâwk ṭhin a, lawh zawh a niha state páwna phurh chhuah zawh hnuah a man inpek kim ṭhin a ni. A tlangpuiin December thla tàwp lam emaw, January thla tìr lamah a man an inpe kim ṭhin.

Tun dinhmunah kuhva chíngtute'n an kuhva rahte hralh zo tawh mah se, a leitute'n state páwna an phurh chhuah theih loh avangin buaina an nei mek. Hun eng emaw chen kuhva rahte phurh chhuah theih a nih loh hnuah phurh chhuah theih ni leh mah se, tun hnaiah Assam lamin an lo dang leh a ni.

HBKCP hruaitute chuan, Assam lam chuan November 22, Nilaini aṭangin phurh chhuah theih a nih tur thu an hrilh tih an sawi a, "Kan zuk dawr chiang a, phurh chhuah theih a nih hmel loh. A buaithlak khawp mai, kan kuhvate hralh tawh mah ila, a leitu lamin an phurh chhuah theih loh chuan pawisa min pek kim tur an nei dawn bik lo," an ti.

An theih ang anga hma an lak ve ṭhin thu sawiin HBKCP hruaitute chuan, "Tunah pawh Assam lam dawr tura kal leh mai tur emaw nite kan ti deuh. A buaithlak khawp mai a, keini level aṭang chuan chinfel vek theih a ni lo," an ti a, state sorkar thuneitute'n hma la se an duh thu an sawi.

HBKCP hmalaknain kuhva chíngtute chu Myanmar aṭanga kuhva rah chângin an la awm reng a; mahse, hun eng emaw ti aṭang khan Myanmar aṭanga kuhva rah phurh, Hachhek tlangdung paltlang hmuh tur a awm meuh lo a ni.