KHAWTHLIR

Thilpek hlan

Mizoram UPC general treasurer Rev. Zoramthara leh hruaitu dang ṭhenkhatte chuan November 17 aṭanga nimin thleng khan Manipur state chhunga buaina vanga mahni in tlanchhiatsan, relief camp-a awmte an tlawh kual a, thilpek eng emaw zat an hlân.

Winter Festival

Tourism department hotute chu nimin khan MINECO-ah Winter Festival 2023 cum Mega Exhibition buatsaih dan tur an sawiho a, mawhphurhna hrang hrang an sem. Festival hi December 7, 2023-ah hawn a ni dawn a, December 11-16, 2023 chhungin Lammualah neih a ni ang. A hawnnaah hian Vengaboys an inlan dawn bakah, Festival chhungin live concert, cosplay leh variety programme-te a awm dawn tih sorkar thuchhuahin a tarlang.

Meizial man

Assam Rifles sipaite chuan November 20, Thawhṭanni khan Zokhawthar leiah ram dang meizial báwmpui (case) panga leh báwm (pack) 43 an man a, Champhaia Customs department hnenah an hlan. Foreign cigarette an man hi Rs 7,05,900 hù a ni.

Project sawiho

Saitual District Planning Committee chu an chairman Dr Lalngura Tlau, bawrhsap kaihhruaiin nimin khan DC conference room-ah an ṭhukhawm a; committee member te, Pawlrang VC member-te leh chanchinbumite an tel. Pawlrang khuain SDG grassroot index ranking-a village indicator framework aṭanga an khuaa hmasawnna ruhrel siamna tur Project Incentive Award an hmuh hmanga project an siamte bawhzui zel dan tur sawiho a ni.

Khum hlan

Siaha Officers' Club-te chuan nimin khan Association of Voluntary Blood Donation (AVBD), Siaha hnenah folding bed pali an hlan. Khum hlan puala inkhawm tawi buatsaihah Siaha Officers' Club leh AVBD, Siaha hruaitute an tel.