Vote chhiar hun sawn a nih theih nana NGOCC hmalakna ZPM-in an thláwp

ZPM office bearer-te chuan resolution siamin, Mizoram inthlanpuia vote chhiar hun atan Pathianni ruat a ni chu pawi an tih thu an tarlang nawn a, vote chhiat ni sawn a nih theihna tura NGO Coordination Committee hmalakna an thlàwp tlat thu an puang.

Nimina Republic Veng YMA Hall-a ZPM OB ṭhukhawm chuan, "Election Commission of India-in vote chhiar hun atan Kristiante ni pawimawh December 3, 2023 (Pathianni) a ruat hi ZPM chuan pawi a ti tak zet," an ti a; vote chhiar hun sawn a nih theih nan ZPM president Lalliansawta'n ziakin ECI-ah ngenna ṭum hnih a thlen tawh thu an tarlang.

ZPM OB resolution chuan, "ZPM mai bakah, Mizoram Kohhran Hruaitu Committee te, NGO Coordination Committee ten theihtawp chhuahin vote chhiar hun sawn a nih theih nan hma an la mek a, NGO Coordination Committee hmalakna hi ZPM party chuan kan thlâwp tlat a ni," a ti.

Mizoram People Forum nena thawhhona thuthlung an zâwm ṭha hle tih sawiin ZPM OB-te chuan, "A lawmawm kan ti a. Hun lo kal zel turah MPF leh party-te thawhhona thuthlung changtlung zawk nen hmalak zel ni se kan ti," an ti a; MLA inthlanpui boruak muanawm tak hnuaiah tluang taka neih a ni chu lawmawm an tih thu leh inthlan buaipuitu zawng zawng chungah an lawm thu an tarlang.

ZPM resolution chuan, 'Kalphung thar, mipui sorkar' a pian theihna tura theihtawp chhuahtute chungah lawmthu an sawi tih a tarlang a, "Zoram hmun hrang hranga kan party mi leh sa mai bakah, Zoram chhung leh páwn aṭanga ZPM thláwp a, kan candidate-te tana theihtawp lo chhuahpuitu zawng zawng chungah lawmthu kan sawi tak zet a ni," a ti bawk.