December 6-15, 2023 inkarah Sorkar thar lâk luh rin a ni

Chief secretary Dr Renu Sharma hoin nimin khan sorkar hotute'n CS conference hall-ah Mizoram sorkar thar ding tur lak luhna, swearing-in ceremony buatsaih dan tur an sawiho a; December 6-15, 2023 inkarah sorkar thar lak luh a rinawm thu tarlan a ni.

Dr Renu Sharma chuan, chief minister leh minister dangte rinawmna thu tiamtirna inkhawm chu a pawimawh hle tih sawiin, mawhphurhna nei department-te'n an tih tur an chian bakah, an mawhphurhnate ṭha tak leh zo taka an hlen ngei a ṭul thu a sawi.

Ṭhutkhawma tarlan danin, MLA inthlanpui hmasaah khan December 11, 2018-ah vote chhiar niin, December 15, 2018-ah sorkar thar lak luh a ni a, Assembly thar ṭhutkhawm hmasa ber chu December 19, 2018-ah neih a ni.

Kumin 2023 inthlanpui kaltlanga sorkar thar lo piang tur chu December 6-15 inkarah lak luh a nih a rinawm tih tarlan a ni a; sorkar thar lak luh hnu, Krismas hma ngeiin Mizoram Legislative Assembly pakuana ṭhutkhawm hmasa ber neih a nih a beiseiawm thu tarlan a ni bawk.