Mizo rilru tihnat tumah MPCC-in ECI puh

Mizoram Pradesh Congress Committee (MPCC) chuan thuchhuah siamin, Mizoram inthlanpui vote chhiar ni atana Election Commission of India (ECI)-in December 3, 2023 Pathianni tih tlang a tum chu Mizote rilru tihnat tumnaa an ngaih thu an tarlang.

MPCC chuan, inthlanpui vote chhiar ní atana Pathianni ruat a ni chu an ngai thu tak hle tih sawiin, "Kohhran leh NGO-te ngenna a ngaih pawimawh loh hi Mizote sentiment ngaih pawimawh lohna lian takah kan ngai a, ECI hian Mizote rilru tihnat a pawi ti lo mai ni loin, a tum lui tlat niin kan ngai," an ti.

MPCC tarlan danin, an president Lalsawta'n October 9, 2023 khan chief election commissioner Rajiv Kumar hnenah lehkha thawnin, vote chhiar hun sawn a, Thawhṭanni leh Zirtawpni inkar ruat turin a ngen. ECI lamin thu thar an neih loh avangin Lalsawta chuan November 13, 2023 khan Chief Electoral Officer lehkha a thawn leh bawk.

Congress party chuan, vote chhiar ni sawn chungchanga Mizo mipui ngenna, NGO Coordination Committee leh Mizoram Kohhran Hruaitute Committee-te'n ngenna an siam ECI-in a ngai pawimawh duh lo leh, Rajasthan vote thlak ní, Hindu hun pawimawh a nih avanga a sawn bik chu a ngai thutak hle tih an tarlang a, "Vote chhiar ni dodal tumna hial awm ta hi pawi kan ti em em. ECI hian Mizoram vote chhiar ni hi sawn ngei se tih hi Congress party duh dan leh dinna a ni," an ti.