Kum 2022 Krismas leh 2023 kumthar vuakvetah Halpuah leh halmawi cheng nuai 5.71 hu man

Kum 2022 Krismas leh 2023 kumthar vuakvet December 20, 2022 leh January 3, 2023 inkarah khan Mizoram pumah dan bawhchhiatna hrang hrangah mi 156 man an ni a, chu'ng zinga mi 46 chu hâlpuah/hâlmawi kaihhnawiha man niin, hâlpuah/hâlmawi man zawng zawng chu Rs 5,71,043 hù a tling.

December 20, 2022 aṭanga January 3, 2023 (ni 15) chhungin Mizoram pumah pawi khawihna leh dan bawhchhiatnaah thubuai 169 ziah luh a ni a, mi 156 man an ni. Thubuai 169 ziah luh zinga 40 chu hâlpuah/hâlmawi kawl leh hâl thubuai a ni a, mi 156 man zinga mi 46 chu hâlpuah/hâlmawi kawl leh hal vanga man an ni.

Hàlpuah/hàlmawi kaihhnawiha man mi 46 zinga mi 25 chu hâlpuah/hàlmawi kawl leh zawrh vanga man niin, mi 21 chu hàl vanga man an ni a; hàlpuah kaihhnawiha thubuai ziah luh 40 zinga 21 chu kawl leh zawrh thubuai niin, mi 19 chu hàl thubuai a ni thung.

Hâlpuah/hâlmawi kaihhnawiha man leh thubuai ziah luh hi Aizawl district-ah a tam ber a; kawl leh zawrh vangin mi 20 man niin, thubuai 18 ziah luh a ni a, hàl vangin mi 18 man niin, thubuai 10 ziah luh a ni. Aizawl district-a hàlpuah/hàlmawi mante hlutna chu Rs 3,59,288 a ni. Nikum krismas leh kumin kuthar vuakvetah khan Kolasib, Serchhip, Lawngtlai, Mamit, Saitual leh Khawzawl district-ahte hâlpuah/hâlmawi vanga man leh thubuai ziah luh a awm lo a ni.

Kum 2020-21 leh kum 2021-22 hunpuiah khan Aizawl leh Lunglei district-ah chuan hâlpuah/hâlmawi kaihhnawiha man leh thubuai ziah luh a awm vek a; chutih laiin, Siaha, Champhai, Kolasib, Serchhip, Lawngtlai, Mamit, Saitual leh Khawzawl district-ahte hàlpuah vanga man an awm lo.

Kum 2022 thlah zan leh 2023 kum thar lawm zan, December 31 zana Aizawla hâlpuah leh hâlmâwi hàl vanga boruak bawlhhlawh dan chu kum 2021 kum hlui thlah zan zanlai aiin a lêt hnih dáwnin a nasa zawk a; rî bengchhen dan pawh phal chin (decibel 45) chu a lêt hnih chuangtein a pêl a ni.

Mizoram Pollution Control Board (MPCB)-in 2022 kum hlui thlah zân boruak dinhmun an teh a, Sikulpuikawna Continuous/Automatic Air Quality Monitoring Station-in boruak dinhmun a chhinchhiahnaa a lan danin, December 31, 2022 zana hâlpuah leh hâlmâwi hâlin boruak a tibawlhhlawh nasa hlê. December 31, 2022 chhûn lama bawlhhlawh nâwi léng vel (PM10) chu chawhrualin 67µg/m3 a nih laiin, zanlai dar 12-1 inkar, hâlpuah/hâlmâwi hâl vanglaiah chuan 285µg/m3 a tling.

December 31, 2021 zan zanlai dar 12-1 inkarah boruak bawlhhlawh dan chu 151µg/m3 a nih laiin, kum 2022 kum hlui thlah zanah chuan a let hnih dáwnin a sang a ni. Boruaka bawlhhlawh nâwi léng tê zual leh hlauhawm zual (PM2.5) pawh December 31, 2022 chhun lamah 17µg/m3 a nih laiin, zanlai dar 12-1 inkarah chuan 67µg/m3 a tling a; chhûn lam nen khaikhinin a lêt thum aia sángin a pung tihna a ni.

Sikulpuikawn bakah Aizawl khawpuia boruak bawlhhlawh tehna - Khatla, Laipuitlang, Dawrpui leh Bawngkawnahte pawh boruak bawlhhlawh dan a nasa hle a; Bawngkawnah 189µg/m3 leh Dawrpuiah 130µg/m3 a tling.

December 31, 2022 zan hian rî bengchhen dan pawh Bawngkawn, Laipuitlang, Dawrpui leh Khatlaahte teh a ni a; hâlpuah/hâlmâwi hàl vanglaiin chawhrualin decibel (dB) 50 a pèl vek. Ri bengchheng rin lai berin Bawngkawnah 104.7dB, Dawrpuiah 90.6dB, Laipuitlangah 100.9dB leh Khatlaah 90.7dB a ni a, ri bengchhen phal chin 45dB a pèl vek a ni.

Kum 2022 kum hlui thlah zanah khan district khawpui dangah pawh kum hmasa aiin boruak bawlhhlawh dan a nasa deuh vek a, Aizawl aiin a zia vek thung a, 100µg/m3 tling a awm lo. Chutihrualin, boruak bawlhhlawh dan pawm theih chin (national standard) 50µg/m3 an pèl nasa vek thung.

MPCB chuan, kum hlui thlah leh kum thar lawmnaa boruak bawlhhlawh dan chu mihring tan a hlauhawm thu an tarlang a ni.