Tleirawl pawngsualtu thiam loh chantir

Kolasib thlanga khaw pakhata hmeichhe tleirawl kum 14 mi ruboa pawngsualtu Mangtindam s/o Lianthawngthang, Tahan, Myanmar lam mi, Khàmráng khua chêng ṭhin chu Kolasib district Fast Track Court chuan nimin khan thiam loh a chantir a, vawiinah hremna tur puan a ni ang.

Thu dawn danin, Kolasib thlang thingtlang khaw pakhata pa pakhat chuan a fanu kum 14 mi chu Mangtindam-a'n November 20/21, 2020 bâwr velah bike hmanga a tlân bopui hnuah a pawngsual zui nia sawiin, November 26, 2020 khan Kolasib Police Station-ah FIR a thehlut a ni.

Kolasib police-te chuan Mangtindam chu FIR an dawn ni, November 26, 2020-ah an man nghal a, a lakah Protection of Children From Sexual Offences Act (POCSO Act) Section 6 leh IPC Section 363 tlawhchhanin thubuai ziah luh a ni.

Mangtindam hian tleirawl chu a chhungte phalna la hmasain tlaia chaw eipuiah a sáwm chhuak a, mahse, chaw ei kham hnuah hawpui loin, Kolasib leh Aizawl lamah a kalpui a, mipat hmeichhiatna a hmanpui ṭhin nia sawi a ni.

Police-te'n Kolasib Court-ah chargesheet an thehluh hnuah Fast Track Court-in a ngaihtuah zui a; judge R Vanlalena chuan nimin khan thutlukna siamin, Mangtindam chu thiam loh a chantir. Mangtindam hi Kolasib District Jail-ah a táng mek a, vawiinah amah hremna tur puan a ni ang.