Election Commission hotute hmu turin NGO-te'n vawiinah Delhi an pan dawn
NGO Coordination Committee (Joint NGO) hruaitute chuan November 7, 2023-a Mizoram MLA inthlana vote tlate chhiar hun tura ruat December 3, 2023 (Pathianni) sawn tura an ngen tawh chungchangah Election Commission of India (ECI) hotute hmua dawr turin a vawiin hian Delhi an pan dawn.
Joint NGO chairman Lalhmachhuana, Central YMA president hnen aṭanga Vanglaini thu dawn danin, ECI hotute dawr tur hian Central YMA general secretary Prof. Malsawmliana bakah, NGOCC-a tel MUP, MHIP, MZP leh MSU aṭangin aiawh pakhat ṭheuh an kal ang.
Hetih lai hian, nimin thleng kha chuan ECI hotute hmaichhana hmu turin appoinment an la nei lo a, vawiinah Delhi thlengin, naktukah ECI hotute hmuh tumin ECI pisaah an kal dawn a ni.
Lalhmachhuana chuan, appoinment la nei lo mah se, ECI hotute hmuh ngei an tum dawn tih sawiin, "Full commission kan hmu thei lo a nih pawhin Chief Election Commissioner tal hmuh ngei ngei kan tum dawn. An office-ah kan kal ang a, kan hmuh theih hun ngaichângin kan nghâk ang," a ti.
Vote chhiar ní thlak a nih loh chuan Protest Day kaltlangpui a nih tur thu sawiin Lalhmachhuana chuan, "Committee-in a rél tawh a ni a, tihdanglam ngawt theih a ni lo," a ti a; Protest Day kalpui dan tur an la rêl fel loh thu leh hman a ṭul chuan a hman dan tur chu committee-in a rêl leh tur thu a sawi.
Tarlan tawh angin, November 18, 2023-a Joint NGO ṭhukhawm chuan Mizoram inthlanpui vote chhiar hun December 3, 2023 sawn a nih theih nan ECI hotute Delhi-ah hmuha sawipui an rêl a, hmaichhana sawipuiin awmzia a neih loh chuan Protest Day huaihawt an rêl a ni.
Joint NGO chuan, "Vote chhiar hun sawn a nih theihna turin Mizoram Kohhran Hruaitute Committee pawh an hmazawnah theihtawp lo chhuah zel turin kan beisei," an ti.
Mizoram chief electoral officer (CEO) Mahdup Vyas chuan tun hnai khan Delhi-ah ECI hotute a kâwm a, Mizoram inthlanpuia vote chhiar hun tura ruat December 3, 2023 (Pathianni) chu tihdanglam a nih dawn loh thu ECI hotute'n an lo hrilh a ni.