Myanmar sipai kum 10 táng turin hrem

Myanmar sipai pakhat, Mizorama tlanbo Min Aung chu tualthah tum thubuaiah court-in thiam loh a chantir a, kum 10 chhung táng tur leh Rs 3,000 chawi tura hrem a ni.

Champhai addl. district & session judge Sylvie Zomuanpuia Ralte chuan Mizorama tlan bo Myanmar sipai Min Aung chu tualthah tum thubuai-ah thiam loh a chantir a ni.

Thu dawn danin, Myanmar sipai Min Aung chu kum 2022 khan a silai nen Mizoramah a tlanbo a, Champhai Zote-a Myanmar ráltlânte dah khawmnaah a awm ve a ni.

September 2022 thla khan ráltlan dang Lalmuanpuia te nupa chu an awmna pindanah luhchilhin, zu lei turin a hrilh a; Lalmuanpuia nupui Malsawmsangi chuan relief camp-ah zu lak luh phal a nih loh avangin an kal theih loh tur thuin a chháng. Min Aung chuan a chempuiin Malsawmsangi chu a ngháwngah leh a malpuiah a sât a, a nupui chhan tumtu Lalmuanpuia pawh a khûp ding lamah a sât zui bawk.

Min Aung chu a tlanbo zui a, a hnuah Hmunhmelṭha phaia thlám pakhatah man niin, Champhai police hnenah hlan a ni.

Min Aung thubuaiah hian Champhai additional district & sessions judge Sylvie Zomuanpuii Ralte chuan tun hnai khan thutlukna siamin, Min Aung chu thiam loh a chantir a, kum 10 chhung táng tur leh Rs 3,000 chawi turin a hrem.

Tualthah tum thubuai bikah Min Aung chu kum sarih chhung táng tur leh Rs 2,000 chawi tura hrem a ni a, mi a hliam avangin kum thum chhung táng tur leh Rs 1,000 chawi tura hrem a ni bawk. Thubuai pahniha hremna hi a hran ve vea kalpui tur a ni a, belh khawmin, kum 10 a tàn dawn bakah, Rs 3,000 a chawi a ngai a; pawisa a chàwi loh chuan thla thum dang tàn belh tura tih a ni bawk.