Sumo counter tinah CCTV vuah rel

Khawzawl district-ah dan phal loha ruihhlo leh thil dang tawlh tihtawp a nih theih nan nimin khan DC meetring hall-ah bawrhsap K Lalrohlua kaihhruaiin sorkar hotute leh lirtheia eizawng pawl aiawhte an ṭhukhawm a; sumo counter tinah CCTV vuah tura hmalak an rêl.

K Lalrohlua tarlan danin, IGP (Intel) Mizoram Circular no. PHQ/IGP(Int.)/PB/28/ND&PS/Drugs/2022/202 dt 20.09.2023 tihchhuah chuan Mizoram maxi cab/sumo service leh sumo counter aṭanga bungraw thawn leh phurh zingah dan phal loh ruihhlo tawlhruk a awm fo ṭhin a ni.

Ṭhukhawm chuan sumo counter enkawltute chu November 27, 2023 aṭangin thil thawntu leh dawngtu turte nihna bakah, thil thawnna motor neitu leh khalhtute nihna kimchang tak chhinchhiah turin an ti a; sumo/maxi cab-a thil thawn turte chu counter kaltlanga thawn vek tawh tur a nih thu leh Khawzawl Tuisenphaiah thil thawnte hi a khât tâwkin police-te'n sumo counter-te chhinchhiah nen a inmil em tih an enfiah (cross-checking) ṭhin dawn a ni.

Counter-a CCTV vuah chungchang chu Khawzawl SP pisa, Khawzawl Maxi Cab Owners Association leh counter neitute'n November, 2023 chhungin dan awmsa leh counter hmunhmate lo zirchiang se, an ti. Khawzawl sumo service dan chungchangah tuna kal dan hi mipui tan a ṭha ber rih nia an hriat avangin kalpui zel ni se, an ti bawk.