Vote chhiar turte tan training

Kolasib district election officer John LT Sanga hoin nimin khan IPR conference hall-ah MLA inthlanpuia vote tla chhiar turte leh vote chhiartu enpuitu turte tan training buatsaih a ni.

Kolasib district-a MLA bial pathuma vote tlate chu Kolasib College-a counting hall pathumah chhiar a ni dawn a, bial tin tan counting hall hran ṭheuh ruahman niin, counting hall tinah hian EVM-a vote tlate chhiarna tur dawhkan 10 ṭheuh leh postal ballot-a vote tlate chhiarna tur dawhkan pakhat ṭheuh a awm dawn.

Polling station hrang hranga vote tlate chu polling station number indawt dan zelin a tahtawla chhiar tura ruahman a ni.

Lawngtlaiah pawh nimin chawhnu khan district election officer (DEO) Joseph H Lalramsanga hoin NIC conference hall-ah vote chhiar tura ruat (counting official) te ṭhutna tur ruahmanna hmasa, 1st Randomization of Counting Official neih a ni a, Returining Officer leh Assistant Returning Officer-te an tel.

Lawngtlai district chhunga vote tla chhiarna tur hian Lawngtlai College-ah Counting Centre pathum ruahman a ni. Vote chhiarna dahkawn hi a vaiin 39 ruahman niin Returning Officer table leh Observer table a vote chhiar pui tura ruat, counting supervisor, counting micro observer leh counting assistant atan mi 187 ruat an ni. Counting official-te ṭhutna tur tihchianna, 2nd Randomization hi December 2, chawhma dar 10-ah neih leh tur a ni ang.

Lawngtlai DEO chuan Lawngtlai district-a vote chhiarna neih tur chu felfai taka kalpui a nih theih nan counting official-a ruatte chuan training an ngaih pawimawh a ṭul thu sawiin, thawhhona ṭha tak hnuaiah training kalpui turin kalkhawmte a chah.