Bawrhsapin kawngpui siam mek a tlawh
Serchhip district bawrhsap David Lalthantluanga, competent authority for land acquisition (CALA) chuan nimin khan Mualpui Chhingchhip VC, Venghlun Chhingchhip VC, Chhiahtlang North leh South VC huamchhungte a tlawh a; national highway 54 kawng chei ṭhatna atana sorkarin ram a lak sak, zangnadawmna dawng tawh zinga 93%-in an in an ṭhiatfel tawh tih tarlan a ni.
David Lalthantluanga hian NH-54 kawng chei ṭhat meka NHIDCL-te hmalak dan a enfiah bakah, zangnadawmna dawng tawh zinga in leh lo la ṭhiat lo an awm em tih leh an thiah loh chhante a endik a; NH-54 kawngpui laih mekah hian Serchhip district-ah sorkarin ram a lâk fel tawh, zangnadawmna dawng tawh zinga 93% chuan an in te an ṭhiat fel tawh.
Zangnadawmna la tawh zingah in ṭhiat lo an la awm avangin July leh August, 2023 khan Magistrate-te'n an in-ah ngei kal chilhin an inte ṭhiat turin thupek (eviction notice) an pe tawh a, nimin khan Bawrhsap hian a hriattir nawn leh bawk. Eviction notice dawngtute hian thupek an zawm loh chuan sorkarin dan anga hmalain, IPC Sec 188 tlawhchhanin thubuai a siamsak thei a ni.
Chhingchhip leh Chhiahtlanga National Highway Monitoring Committee member-te chuan Bawrhsap hi ṭawiawmin, kawngpui laih meka harsatna awm te, khawtlang mipui mamawhte an thlen.
Bawrhsap chuan an thu thlente ṭha taka lo dawngsawngin, danin a phal chin ang zela hmalakpui a tum thu a sawi a, "March 2024 tawpah kawngpui hi hawn hman ngei tum a ni," a ti.